Ncp News : राष्ट्रवादी काँग्रेस पक्ष आणि चिन्हाबाबत होणार उद्या सुनावणी; सुप्रीम कोर्ट मोठा निर्णय देणार?

Ncp News : राज्यातील विधानसभा निवडणुका आता लवकरच होणार आहेत. त्यामुळे विधानसभा निवडणुकांआधी याचा राष्ट्रवादी काँग्रेस कुणाची यावर सुप्रीम कोर्टाचा निकाल लवकरच येण्याची शक्यता आहे. त्याबाबतचा निर्णय घेण्याचा अधिकार सुप्रीम कोर्टाला असणार आहे. मंगळवारी या प्रकरणी सुप्रीम कोर्टात सुनावणी होणार आहे.

राष्ट्रवादी काँग्रेस (NCP) पक्षाचे नाव आणि चिन्हाबाबतच्या सुप्रीम कोर्टात मंगळवारी सुनावणी होणार आहे. राष्ट्रवादी हे नाव आणि घड्याळ चिन्हं उपमुख्यमंत्री अजित पवार यांच्या गटाला दिल्याच्या विरोधात माजी केंद्रीय मंत्री शरद पवार (Sharad Pawar) यांच्या गटाने सुप्रीम कोर्टाच्या विरोधात याचिका दाखल केली होती.

सुप्रीम कोर्टात शरद पवार यांच्या गटाने दाखल केलेल्या याच याचिकेवर उद्या सुनावणी होणार आहे. विशेष म्हणजे नागालँडमधील आमदार अपात्रता प्रकरणाचीही याचवेळी सुनावणी होणार आहे. जस्टीस सूर्यकांत आणि जस्टीस उज्ज्वल भुयन यांच्या खंडपीठासमोर सुनावणी होणार आहे.

दोन वर्षांपूर्वी शिवसेनेत उभी फूट पडली होती. त्यावेळी एकनाथ शिंदे यांनी बंड केले होते. त्यानंतर महाविकास आघाडीचे सरकार कोसळले होते. त्यानंतर एकनाथ शिंदे व भाजपने एकत्रित येत महायुतीचे सरकार स्थापन केले होते. त्यानंतर एक वर्षापूर्वी राष्ट्रवादी काँग्रेसमध्ये उभी फूट पडली होती. उपमुख्यमंत्री अजित पवार यांच्या बंडामुळे पक्ष दोन गटात विभागला गेला होता.

सुप्रीम कोर्टाने राष्ट्रवादी काँग्रेसचा निर्णयही विधानसभा अध्यक्षांना घेण्याचा आदेश दिला. पण शरद पवार गट आणि ठाकरे गटाला विधानसभा अध्यक्षांचा निकाल मान्य नसल्याने त्यांनी संबंधित निकालाच्या विरोधात सुप्रीम कोर्टात धाव घेतली आहे.

हे प्रकरण गेल्या अनेक दिवसांपासून सुप्रीम कोर्टात प्रलंबित आहे. आता राज्यातील विधानसभा निवडणुका देखील जवळ आल्या आहेत. त्यामुळे विधानसभा निवडणुकांआधी याचा निकाल लावणे सुप्रीम कोर्टासाठी महत्त्वाचे असणार आहे. त्यामुळे या प्रकरणी सुप्रीम कोर्टात मंगळवारी होणाऱ्या सुनावणीकडे सर्वांचे लक्ष लागले आहे.