Jaykumar Gore News : महिला डॉक्टरच्या मोबाईलमधील माहिती बाहेर काढायला लावू नका, मृत्युनंतर बदनामी करण्याची संस्कृती नाही; मंत्री गोरे चाकणकरांच्या एक पाऊल पुढे

Jaykumar Gore News : फलटण येथील महिला डॉक्टरची मृत्यूनंतर बदनामी केल्याचा आरोप महिला आयोगाच्या अध्यक्षा रुपाली चाकणकर यांच्यावर होत आहेत. अशात "महिला डॉक्टर आत्महत्या प्रकरणाचे सगळे रहस्य त्यांचा मोबाईल, दोन्ही संशयितांचे मोबाईल आणि इतर काही मोबाईलमध्ये आहे. पण कुणाच्या मृत्यूनंतर त्याचा अनादर करू नये, अशी आपली संस्कृती आहे. या प्रकरणाचे कोणीच राजकारण करु नये आणि मोबाईलधील वास्तव पुढे आणण्याची वेळ येऊ देऊ नये, असा इशारा देत ग्रामविकास मंत्री तथा सोलापूरचे पालकमंत्री जयकुमार गोरे यांनी चाकणकर यांच्याही एक पाऊल पुढे टाकल्याचे बोलले जाते. गोरे यांचा हा इशारा अप्रत्यक्षपणे रामराजे निंबाळकर व महाविकास आघाडीच्या नेत्यांना दिला.

गोरे म्हणाले, मेहबूब शेख याने तपासी अधिकाऱ्याचे नाव सुचवावे. कोणत्या समितीकडून तपास करावा, हे देखील त्यांनी सुचवावे. त्याला एसआयटी म्हणावे की मेहबूब समिती म्हणावे, हेही सुचवावे. ते जी समिती सुचवतील त्या समितीकडून चौकशी करावी, अशी मुख्यमंत्र्यांना विनंती करतो. त्यांचे समाधान होईल, त्या अधिकाऱ्याने चौकशी करावी. सत्य बाहेर येऊ द्या, वास्तव वेगळे आहे, असेही त्यांनी स्पष्ट केले.

सोलापूर जिल्ह्यातील अनेक नेते भाजपच्या वाटेवर आहेत. ऑपरेशन कमळ ही मोहीम थांबलेली नाही. ज्या त्या वेळी योग्य नेत्यांचे पक्षप्रवेश होतील. आगामी जिल्हा परिषद आणि महानगरपालिका निवडणुका भाजप स्वबळावर जिंकेल, असा मला विश्वास आहे. माजी आमदार दिलीप माने, माढ्याचे शिवसेनेचे माजी जिल्हा संपर्कप्रमुख प्रा. शिवाज सावंत यांचा योग्यवेळी पक्षप्रवेश होईल, असेही त्यांनी यावेळी स्पष्ट केले.

विरोधकांची मती व बुद्धी चोरीला

विरोधकांच्या सत्याच्या मोर्चावरूनही गोरे यांनी जोरदार हल्लाबोल केला. विरोधकांच्या मतांची चोरी झाली नाही, तर त्यांची मती व बुद्धी चोरीला गेली आहे. त्यांना अजूनही कळेना की आपला पराभव का होत आहे. लोकांमध्ये संभ्रम निर्माण करण्याचा त्यांचा प्रयत्न आहे, असा टोलाही गोरे यांनी लगावला.