Mohite Patil VS Gore : मोहिते पाटलांनी उडवली गोरेंची खिल्ली : 'क्रॉस वोटिंग ओळखला ते काय मिस्टर इंडिया आहेत का?'

Solapur, 14 June : विधान परिषद निवडणुकीच्या निमित्ताने सोलापूरमध्ये मोहिते पाटील आणि पालकमंत्री जयकुमार गोरे यांच्यात जोरदार कलगीतुरा रंगला आहे. महापालिका नगरसेवकांच्या समोर बोलताना पालकमंत्री गोरे यांनी ‘क्रॉस वोटिंग’ करू नका, मला ते ओळखतं येतं’ असा इशारा दिला होता. त्यावर खासदार धैर्यशील मोहिते पाटील यांनी पालकमंत्र्यांची खिल्ली उडवत ‘ते काय मिस्टर इंडिया आहेत का?’ असा सवाल केला आहे.

विधान परिषदेच्या स्थानिक स्वराज्य संस्थेच्या सोलापूर मतदारसंघात भाजपकडून माजी आमदार राजेंद्र राऊत आणि राष्ट्रवादी काँग्रेस शरदचंद्र पवार पक्षाचे जिल्हाध्यक्ष वसंतराव देशमुख यांच्यात लढत होत आहे. भाजपकडे बहुमत असले तरी गुप्त मतदान प्रक्रियेमुळे ‘क्रॉस वोटिंग’ची भीती कायम आहे.

खासदार धैर्यशील मोहिते पाटील यांनी विधान परिषदेच्या निवडणुकीत भाजपला आव्हान दिले आहे. वसंतराव देशमुख उमेदवार असले तरी खरी लढत ही मोहिते पाटील आणि गोरे यांच्यात आहे. दोन्ही बाजूकडून एकमेकांची ताकद अजमावली जात आहे.

पालकमंत्री जयकुमार गोरे यांनी सोलापूरमध्ये नगरसेवकांच्या बैठकीत बोलताना क्रॉस वोटिंग करू नका, ते मला समजते, असा इशारा भाजपच्या नगरसेवकांना दिला होता. त्यावरून खासदार मोहिते पाटील यांनी पालकमंत्री गोरे यांची खिल्ली उडवत ‘क्रॉस वोटिंग ओळखायला ते काय मिस्टर इंडिया आहेत का?’ असा सवाल केला आहे.

पालकमंत्र्यांची भूमिका प्रत्येक वेळी बदलते, कधी ते मंत्री, कधी पोस्टमन, तर कधी ज्योतिषी असतात. त्यामुळे ते नक्की कोणत्या भूमिकेत आहेत, हे त्यांनी ठरवावं. आपण केलेले मतदान कोणालाही समजत नाही. त्यामुळे प्रत्येकाने सद्‌सदविवेक बुद्धीने मतदान करावे. क्रॉस वोटिंगबद्दल संभ्रम निर्माण केला जात आहे, धमकाविण्याचे प्रकार घडत आहेत, त्याबाबत मी सोलापूर निवडणूक निर्णय अधिकाऱ्यांकडे आक्षेप नोंदवणार आहोत, असेही धैर्यशील मोहिते पाटील यांनी सांगितले.