Supriya Sule: ...तर अजितदादांना नोटीस पाठवणार ; सुप्रिया सुळे यांचा इशारा

Ahilyanagar News: "राष्ट्रवादी काँग्रेस हा अजित पवार याचा पक्ष नाही, घड्याळ चिन्ह देखील त्यांचे नाही. जर पक्षाच्या चिन्ह्याखाली 'न्यायप्रविष्ट' असे लिहिले नसेल तर तुम्ही मला त्याचे फोटो पाठवा, मी त्यांना कोर्टाकडून नोटीस पाठवते," असा इशारा राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी दिला आहे. त्या अहिल्यानगर येथील सभेत बोलत होत्या.

आमची लढाई ही कुठल्याही व्यक्तीविरोधात नाही, तर पक्षाच्या विरोधात आहे. कोर्टात केस सुरु आहे. राष्ट्रवादी काँग्रेस हा अजित पवार याचा पक्ष नाही, चिन्ह देखील त्यांचे नाही, असे कोर्टाने स्पष्ट सांगितले आहे.

अहिल्यानगर शहर विधानसभा मतदारसंघात महाविकास आघाडीच्या उमेदवार अभिषेक कळमकर यांच्या प्रचारासाठी घेण्यात आलेल्या सभेत खासदार सुप्रिया सुळे यांनी महायुतीमधील नेते उपमुख्यमंत्री देवेंद्र फडणवीस आणि अजित पवार यांच्यावर तोफ डागली. त्या म्हणाल्या, "देवाभाऊ हे नाव मला खूप आवडते. पण त्याला संगत खराब लागली. आजच्या भाजपपेक्षा आधीची भाजप चांगली होती",

सुप्रिया सुळे यांनी माजी गृहमंत्री दिवगंत आर. आर. पाटील आणि सध्याचे गृहमंत्री देवेंद्र फडणवीस यांच्या कामाची तुलना करीत फडणवीसांना खडेबोल सुनावले. आर. आर. पाटील गृहमंत्री असताना त्यांनी एक लाख पोलिस भरती केली. परंतु आजचा गृहमंत्री बदलापूर घटनेनंतर बंदूक दाखवतो. यातून देवाभाऊ संगतीने बिघडला हे स्पष्ट होते, असा टोमणा सुळे यांनी फडणवीस यांच्यासह अजित पवार यांना लगावला.

'देवाभाऊ' या नावावरुन सुप्रिया सुळे यांनी देवेंद्र फडणवीस यांना टोमणा मारला. एकेकाळी देवाभाऊ या नावाबाबत मला खूप आधार होता, हे नाव मला खूप आवडते, विरोधक असावा पण तो दिलदार असावा, असे वाटत होते. पण 'देवाभाऊ'आता खराब संगत लागली आहे. आधीची भाजप चांगली होती. पण आताची भाजपला चांगली संगत नाही"