Arunadevi Pisal: डांगोरा पिटणाऱ्यांनी कोणता प्रकल्‍प आणला?

Arunadevi Pisal: मतदारसंघाच्या सर्वांगीण विकासकामांचा डांगोरा पिटणाऱ्या आमदारांनी कोणता मोठा प्रकल्प आणला? किती तरुणांना रोजगार उपलब्ध करून दिला? कोणती संस्था उभी केली? हे सांगण्याची वेळ आता आली आहे, असा घणाघात अरुणादेवी पिसाळ यांनी आज केला.

वाई, खंडाळा, महाबळेश्‍‍वर मतदारसंघातील राष्‍ट्रवादी काँग्रेस शरदचंद्र पवार पक्षाच्‍या, महाविकास आघाडीच्‍या अधिकृत उमेदवार म्‍हणून खंडाळा तालुक्यातील भादे गटात आणि खंडाळा, शिरवळसह लोणंदमध्‍ये त्‍यांनी प्रचारफेरीद्वारे मतदारांशी संवाद साधला. त्‍या वेळी त्‍या बोलत होत्‍या.

दरम्‍यान, अरुणादेवी पिसाळ यांना मतदारसंघातील पहिल्या महिला आमदार बनविण्यासाठी मतदारांनी ही निवडणूक हातात घेतली असल्‍याचे रमेश धायगुडे- पाटील यांनी सांगितले.

ते म्हणाले, ‘‘या मतदारसंघाला विकासाचा दृष्‍टिकोन असणाऱ्या प्रतिनिधींची गरज अरुणादेवींच्या रूपाने पूर्ण होणार आहे. मतदासंघात आमदारांविरोधी सुप्‍त लाट आहे. सगळं मलाच, आम्हालाच पाहिजे, हा त्यांचा अट्टहास स्वाभिमानी मतदारांच्या जिव्हारी लागला असून, या मतदारसंघात महाविकास आघाडीचा विजय निश्चित आहे.

यावेळी पाडेगाव, बाळूपाटलाचीवाडी, पिंपरे, आंदोरी, मरिआईचीवाडी, बावकलवाडी, वाघोशी, कराडवाडी, वाठार कॉलनी, शेडगेवाडी, भादे, तोंडल, लोणी, भोळी, मोर्वे या गावांत मतदारांनी उत्स्फूर्त प्रतिसाद दिल्‍याचेही अरुणादेवी पिसाळ यांच्‍या समर्थकांनी सांगितले.

फोडाफोडीला जनता कंटाळली

विद्यमान आमदार जो गट, पक्ष, संघटना त्यांना पाठिंबा देतात त्यांना निकामी करतात. या तिघा भावांच्या गटबाजी आणि फोडाफोडीच्या राजकारणाला खंडाळा तालुक्यातील जनता कंटाळली आहे. उदयनराजेंच्या लोकसभा निवडणुकीवेळी आमदार गट कोणाचे काम करत होता, हे जगजाहीर आहे.

ते महायुतीचा धर्म पाळत नसतील तर आम्हीही पाळणार नाही. गेली १५ वर्षे नाकर्तेपणाला कंटाळून आम्ही अरुणावहिनींच्या विजयासाठी झटत आहोत, असे भाजपचे हर्षवर्धन शेळके-पाटील यांनी यावेळी सांगितले.