Sangali News: सांगलीचे पदवीधर आमदार अरुण लाड यांचे चिरंजीव शरद लाड हे उद्या (मंगळवारी) भाजपमध्ये प्रवेश करणार आहेत. भाजपमध्ये पक्ष प्रवेश करण्यापूर्वी त्यांनी पदवीधराच्या उमेदवारीची अट भाजप समोर ठेवली होती. त्यामुळे गेल्या दीड महिन्यापासून त्यांचा पक्ष प्रवेश रखडला होता. मात्र आता खुद्द राज्याचे उच्च आणि तंत्र शिक्षण मंत्री आणि सांगली जिल्ह्याचे पालकमंत्री चंद्रकांत पाटील यांनीच लाड यांचा पदवीधरसाठी क्लेम असल्याचे जाहीर केल्यानंतर भाजप वर्तुळात लाड यांचे नाव निश्चित झाल्याचे संकेत दिले आहेत. त्यामुळे एकंदरीत भाजप वर्तुळात पदवीधर लढण्यासाठी हालचाली गतिमान झाल्या आहेत.
वास्तविक पाहता गेल्या दोन निवडणुकींचा अंदाज घेतल्यात विद्यमान आमदार अरुण लाड हे नेहमीच चर्चेत राहिले आहेत. पुणे पदवीधर साठी 2012 च्या निवडणुकीत भाजपचे नेते आणि उच्च शिक्षण मंत्री चंद्रकांत पाटील विजयी झाले असले तरी अरुण लाड यांच्या बंडखोरीचा फटका काँग्रेस आणि राष्ट्रवादीला बसला. अरुण लाड यांची व्यक्तिगत ताकद जवळपास निर्णायक समजली जाते. तर मागील वेळी झालेल्या निवडणुकीत जवळपास ४९ हजार मत फरकाने अरुण लाड काँग्रेस, शिवसेना आणि राष्ट्रवादीकडून विजयी झाले होते. त्यावेळी काँग्रेस, तत्कालीन राष्ट्रवादी काँग्रेस आणि शिवसेनेची महाविकास आघाडी सत्तेवर होती. त्यामुळे तत्कालीन राष्ट्रवादी काँग्रेसचे उमेदवार लाड यांच्यासाठी अनुकूल राजकीय वातावरण होते. त्याचा फायदा लाड यांना झाला होता. शिवाय लाड यांचा सांगली जिल्ह्यात लोकसंपर्क आहे. राज्यात असलेल्या महाविकास आघाडी सरकारमुळे राष्ट्रवादीसह मित्रपक्षांचा त्यांना फायदा झाला होता.
आता लोकसभा आणि विधानसभा निवडणुकीत यश मिळाल्यानंतर भाजपने आता पदवीधर मतदार संघांकडे लक्ष केंद्रीत केले आहे. कारण १९९० पासून ताब्यात असलेला पुणे पदवीधर मतदार संघ २०२० च्या निवडणुकीत हातातून गेल्याची सल भाजपला कायम आहे. त्यामुळे निवडणुकीला एक वर्ष असतानाच भाजपने हा मतदार संघ पुन्हा काबीज करण्यासाठी आखणी सुरू केली आहे. उद्या भाजपकडे पॉकेट असणारा चेहरा नाही. त्यामुळे सहाजिकच शरद लाड यांना भाजपमध्ये घेऊन पदवीधर ची उमेदवारी दिली जाऊ शकते. कारण मागील निवडणुकीत राज्यात सत्ता असल्याचा फायदा महाविकास आघाडीला झाला. आता राज्यात महायुतीची सत्ता असल्याने पदवीधर च्या निवडणुकीत महायुतीच्या उमेदवाराला त्याचा फायदा होणार असल्याचा अंदाज आहे. त्यामुळे लाड आज भाजपमध्ये घेऊन भाजपसह राष्ट्रवादी आणि शिवसेनेची ताकद लाड यांच्या मागे उभी करण्याचा प्लॅन सध्या तरी भाजपचा दिसत आहे.
पुणे पदवीधर मतदारसंघातून २०१४ दरम्यान झालेल्या निवडणुकीत भाजपाचे प्रदेशाध्यक्ष चंद्रकांत पाटील विरुद्ध राष्ट्रवादीकडून माजी खासदार श्रीनिवास पाटील यांचे चिरंजीव सारंग पाटील यांच्यात लढत झाली होती. मात्र उमेदवारी न मिळाल्यानं आमदार अरूण लाड यांनी बंडखोरी करत अपक्ष निवडणूक लढवली होती.
पण या निवडणुकीत चंद्रकांत पाटील विजयी झाले होते. त्यांना ६२ हजारांच्या आसपास मतदान झाले होते, तर सारंग पाटील यांना ५९ हजारांच्या वर मतदान झाले. तर तर अरुण लाड यांना २५ हजार इतके मते मिळाली होती. अवघ्या २ हजारांच्या फरकाने भाजपाने ही जागा राखत चंद्रकांत पाटील विजयी झाले होते. विशेषत: म्हणजे अरूण लाड यांनी घेतलेली २५ हजारांहून अधिक मते लक्षणीय होती, त्यामुळे लाड यांच्या बंडखोरीचा फटका बसल्याने राष्ट्रवादी काँग्रेसला पुणे पदवीधर मतदारसंघात बसला होता.
२०२० च्या पुणे पदवीधर मतदारसंघात काँग्रेस , राष्ट्रवादीकडून आमदार अरुण लाड तर भाजपकडून संग्राम देशमुख अशी लढत झाली. लाड यांनी 1 लाख 22 हजार 145 मते घेतली. तर देशमुख यांना 73 हजार 321 मते मिळाली. 48 हजार 824 मतांनी बीजेपीचे संग्राम देशमुख यांचा पराभव केला आहे. त्यावेळी काँग्रेस, राष्ट्रवादी एकत्र होते. आमदार सतेज पाटील, वैद्यकीय शिक्षण मंत्री हसन मुश्रीफ, जयंत पाटील यांची मोठी ताकद लाड यांच्या मागे होती.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.