Patan BJP : उदयनराजेंचे हात बळकट; विक्रमबाबा पाटणकरांवर फडणवीसांनी सोपवली मोठी जबाबदारी

Patan News : जिल्ह्यातील डोंगराळ आणि दुर्गम पाटण विधानसभा मतदारसंघातील भारतीय जनता पक्षाचे निवडणूक प्रमुख म्हणून जिल्हा परिषदेचे माजी उपाध्यक्ष विक्रमबाबा पाटणकर यांची नियुक्ती करण्यात आली आहे. पाटण तालुक्यातील प्रत्येक गावनिहाय भाजपच्या कार्यकर्त्यांचे जाळे असणाऱ्या पाटणकर यांच्यावर भाजप प्रदेशाध्यक्ष चंद्रशेखर बावनकुळे आणि उपमुख्यमंत्री देवेंद्र फडणवीस यांनी ही जबाबदारी सोपवली आहे. ( Patan Assembly Constituency 2024)

खासदार उदयनराजे भोसले यांच्या प्रमुख उपस्थितीत गुरुवारी मुंबईत चंद्रशेखर बावनकुळे आणि देवेंद्र फडणवीस यांनी पाटण विधानसभा निवडणूक प्रमुख म्हणून विक्रमबाबा पाटणकर यांच्यावर जबाबदारी सोपवल्याचे अधिकृत पत्र दिले.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

बावनकुळे म्हणाले, 'विक्रमबाबा पाटणकर यांच्यासारखे तडफदार नेतृत्व भाजपला लाभले आहे. अतिशय संयमी असलेल्या विक्रमबाबांवर पक्षाची फार मोठी जबाबदारी आहे. पाटण तालुक्यात सर्वांना बरोबर घेवून जाणारा धडाडीचा नेता म्हणून विक्रमबाबांची विशेष ओळख आहे. त्यामुळेच पक्षाने त्यांच्यावर ही जबाबदारी सोपवली आहे. ही जबाबदारी ते संयमाने पार पाडतील'.

यावेळी उपमुख्यमंत्री फडणवीस (Devendra Fadnavis) यांनी विक्रमबाबांना शुभेच्छा देताना, कार्यकर्ता ते नेता कसा असावा ? याचे उत्तम उदाहरण म्हणून विक्रमबाबांना पाटण तालुक्यासह जिल्हा ओळखतो. जिल्हा परिषदेचे उपाध्यक्ष म्हणून काम केलेल्या बाबांना ग्रामीण आणि शहरी भागातील व्यक्तींशी नाळ जोडली गेली आहे. खासदार उदयनराजे भोसले यांचे निकटवर्तीय असलेले विक्रमबाबा सर्वांना परिचित आहेत. त्यांना भविष्यात लागेल तसे सहकार्य केले जाईल, असे ते म्हणाले.

दरम्यान, भाजपचे सातारा लोकसभेचे संयोजक आणि भाजप प्रदेश कार्यकारीण सदस्य सुनील काटकर, सुशांत निंबाळकर, पंकज चव्हाण तसेच मान्यवर उपस्थित होते.

(Edited By-Ganesh Thombare)