शिवसेनेतील बंडानंतर राज्यात भाजपचे सरकार येणार का...? धनंजय महाडिक म्हणाले...

सोलापूर : सध्याच्या राजकीय परिस्थितीवर भारतीय जनता पक्षाची (bjp) भूमिका ही 'वेट अँड वॉच'ची आहे. शिवसेनेच्या (shivsena) बंडखोर आमदारांनी जी भूमिका घेतलेली आहे, त्यावर भाजप लक्ष ठेवून आहे. भाजपचे वरिष्ठ नेते देवेंद्र फडणवीस (Devendra Fadnavis), चंद्रकांत पाटील (chandrakant Patil) यांनी अजून कोणतीही भूमिका घेतलेली नाही. बंडखोरांकडून काय निर्णय होतो, यावर आम्ही लक्ष ठेवून आहोत, असे भाजपचे नवनिर्वाचित राज्यसभा सदस्य (खासदार) धनंजय महाडिक (Dhananjay Mahadik) यांनी सांगितले. (Will BJP government in maharashtra after Shiv Sena rebellion ...? Dhananjay Mahadik said ...)

मोहोळ तालुक्यातील भीमा सहकारी साखर कारखान्याच्या निवडणुकीचा उमेदवारी अर्ज भरण्यासाठी खासदार महाडिक हे सोलापुरात आले होते. त्यावेळी त्यांना सध्या राजकीय उलथापालथीनंतर राज्यात भाजपचे सरकार बसेल का, असा प्रश्न विचारण्यात आला होता. त्यावर खासदार महाडिक यांनी वरील उत्तर दिले.

खासदार महाडिक म्हणाले की, राज्यात भाजप सरकार येणार की नाही, याबाबत आज बोलणे योग्य होणार नाही. सध्याच्या परिस्थितीवर भारतीय जनता पक्षाची भूमिका ही 'वेट अँड वॉच'ची आहे. कारण राज्यात आज अभूतपूर्व परिस्थिती निर्माण झाली आहे. अशी परिस्थिती यापूर्वी कधीही आलेली नव्हती, त्यामुळे त्यावर आज बोलणे उचित ठरणार नाही.

महाविकास आघाडी सरकारमधील शिवसेनेत उभी फूट पडली आहे. त्यामुळं हे सरकार कोलमडेल, अशी चिन्ह दिसत असताना राज्यातील विरोधी पक्ष भाजप मात्र याकडे 'वेट अँड वॉच'च्या भूमिकेत दिसून येत आहे. राज्यातील सर्वच नेते यावर बोलण्यास तयार नाहीत. एकीकडे शिवसेनेचे बंडखोर नेते एकनाथ शिंदे हे आपल्यामागे शक्तीशाली पक्ष असल्याचे सांगत असताना भाजप नेते मात्र याबाबत हात झटकत आहेत. हा शिवसेनेतील अंतर्गत प्रश्न आहे, त्यावर आम्ही बोलणे उचित नाही, असे सर्रास सर्व नेते सांगत आहेत.

दरम्यान, खासदार धनंजय महाडिक यांनी सोलापुरात जिल्हा उपनिबंधक कार्यालयात येऊन भीमा सहकारी साखर कारखान्याच्या निवडणुकीचा उमेदवारी अर्ज भरला. या वेळी त्यांनी शिवसेनेकडून सुरू असलेल्या तोडफोडीवरही बोलण्यास नकार दिला आहे.