Congress News : 'मविआ'च्या मुख्यमंत्रीपदाच्या चेहऱ्याबाबत रमेश चेन्निथला यांची मोठी माहिती; म्हणाले,...

Mumbai News : लोकसभा निवडणुकीत मिळलेल्या यशानंतर काँग्रेसचा कॉन्फिडस चांगलाच वाढला आहे. विधानसभा निवडणुका तोंडावर आल्या असल्याने काँग्रेसने तयारी सुरु केली आहे. त्यामध्ये काँग्रेसने रणनीती आखात आतापासूनच कंबर कसली आहे.

महाविकास आघाडीचे जागावाटप ठरवण्यापूर्वीच त्यांनी रविवारी बैठक घेतली. या बैठकीला काँग्रेसच्या (Congress) दिग्गज नेत्यांनी हजेरी लावली होती. या बैठकीनंतर बोलताना महाविकास आघाडीच्या मुख्यमंत्रीपदाच्या चेहऱ्याबाबत रमेश चेन्निथला यांनी मोठे विधान केले आहे. (Congress News)

आगामी काळात होत असलेल्या विधानसभा निवडणुकीच्या पार्श्वभूमीवर काँग्रेसची महत्त्वाची बैठक रविवारी मुंबई येथे पार पडली. या बैठकीनंतर काँग्रेसचे प्रभारी रमेश चेन्निथला यांनी प्रसार माध्यमांशी बोलताना येत्या काळात राज्यात महाविकास आघाडीचे सरकार येणार असल्याचा दावा केला आहे.

त्यासोबतच महाविकास आघाडीचा मुख्यमंत्रीपदाचा चेहरा अजून ठरलेला नाही. त्याबाबतचा निर्णय निवडणुकीनंतर तीन पक्ष एकत्रित बसून घेतील, असे काँग्रेसचे प्रभारी रमेश चेन्निथला यांनी सांगितले. त्यासोबतच महाविकास आघाडीच्या विधानसभेच्या जागावाटपाबाबत 7 ऑगस्टला मुंबईत आघाडीची बैठक होणार आहे. त्यामध्ये कोणाच्या वाट्याला किती जागा येणार यावर सविस्तर चर्चा होणार असल्याचे त्यांनी सांगितले.

मुंबईतील एका हॉटेलमध्ये पार पडलेल्या या बैठकीस काँग्रेसचे प्रदेशाध्यक्ष नाना पटोले (Nana Patole), विरोधी पक्षनेते विजय वडेट्टीवार, काँग्रेसचे विधिमंडळ नेते बाळासाहेब थोरात, माजी मुख्यमंत्री पृथ्वीराज चव्हाण यांच्यासह राज्यातील दिग्ग्ज मंडळी उपस्थित होते

या बैठकीत काँग्रेसच्या निवडणुकीबाबत रणनीती ठरली आहे. जागावाटपाच्या बैठकीत किती जागावर काँग्रेस दावा करणार याबाबतही बैठकीत ठरले आहे. त्यानुसार काँग्रेस आघाडीच्या बैठकीत जागांची मागणी करणार असल्याचे समजते.

दरम्यान, काँग्रेसच्या या बैठकीस ठाकरे गटाचे युवा नेते वरूण सरदेसाई यांनी हजेरी लावली. त्यामुळे सर्वांच्या भुवया उंचावल्या आहेत. दुसरीकडे वरूण सरदेसाई यांनी या बैठकीवेळी काँग्रेस नेत्यांची भेट घेतल्याने वांद्रे पूर्वचे आमदार झिशान सिद्दिकी यांनी नाराजी व्यक्त केली आहे.