Rohit Pawar Vs Ram Shinde : राम शिंदेंनी माफी मागावी..., रोहित पवार संतापले; म्हणाले, 'चुकीचंच नाही तर अनादर...'

Rohit Pawar News : महाराष्ट्राच्या इतिहासामध्ये पहिल्यांदा विधीमंडळा दोन सभागृहात विरोधी पक्षनेते नाहीत. विधान परिषदेसाठी काँग्रेसने सतेज पाटील यांच्या नावाचा प्रस्ताव देऊनही त्यावर अजून निर्णय झालेला नाही. त्यामुळे विधीमंडळाच्या पूर्वसंध्येला काँग्रेसचे विधीमंडळ नेते विजय वडेट्टीवार यांनी मुख्यमंत्री फडणवीसांवर जोरदार टीका केली.

दरम्यान, विरोधी पक्षनेतेपदाच्या नियुक्तीबाबत बोलताना ‘‘स्वातंत्र्यानंतर सुरु झालेल्या प्रथा आज सुरु असणं अभिप्रेत आणि अपेक्षित नाही,’’ असे विधान हे विधानपरिषदेचे सभापती प्रा. राम शिंदे यांनी केल्याचे रोहित पवार यांनी म्हटले आहे.

रोहित पवार म्हणाले, 'सभापती राम शिंदे यांचे हे विधान अत्यंत दुर्दैवी आणि लोकशाही मूल्यांचा अवमान करणारं आहे. हाच निकष प्रा. राम शिंदे हे ज्या सभागृहाचे सदस्य आहेत त्या विधानपरिषदेलाही लावणार का? कारण विधानपरिषदेची स्थापना ही स्वातंत्र्यापूर्वी १९३५ च्या भारत सरकार कायद्यानुसार तत्कालीन मुंबई प्रांत असताना झाली.'

पुढे ते म्हणाले की, संवैधानिक पदावरील व्यक्तीने विरोधी पक्षनेतेपदाबाबत असं विधान करणं हे केवळ चुकीचंच नाही तर लोकशाहीचा अनादर करणारं आहे. याबाबत त्यांनी माफी मागितली पाहिजे.

सरकार संविधान विरोधी

विजय वडेट्टीवार म्हणाले, महाराष्ट्राच्या इतिहासात पहिल्याचा दोन्ही सभागृहातील विरोधी पक्षनेते पद रिक्त ठेवण्यात आले आहे. विरोधी पक्षनेते या संवैधानिक पद असताना त्यावर नेमणूक होत नाही. हे सरकार संविधान विरोधी आहे.