Maharashtra Politics : 'पुढील महिन्यात मोठा धमाका, भाजपकडून मित्रपक्षाची शिकार...'; रोहित पवारांचा एकनाथ शिंदेंकडे इशारा?

Rohit Pawar News : महाराष्ट्राला काळिमा फासणारे भोंदू खरात प्रकरण असंच बाहेर आलेलं नाही तर ठरवून आणलं गेलं असून ही फक्त सुरुवात आहे, असे सांगत भाजपकडून सत्तेतील एका मित्र पक्षाची शिकार केली जाणार असल्याचा इशारा आमदार रोहित पवार यांनी दिला आहे.

रोहित पवार यांनी ट्विट करत म्हटले आहे की, 'भाजपचे सत्तेतले मित्रपक्ष विरोधी पक्षाचे आमदार खासदार फोडणार असल्याच्या बातम्या बघितल्या, परंतु वस्तुस्थिती मात्र वेगळीच आहे, पुढच्या महिन्याच्या शेवटपर्यंत सत्तेतल्या मोठ्या पक्षाकडून सत्तेतल्या त्यांच्या मित्रांचीच शिकार केली जाणार असल्याची पक्की माहिती आहे.'

महाराष्ट्राला काळिमा फासणारे भोंदू खरात प्रकरण असंच बाहेर आलेलं नाही तर ठरवून आणलं गेलं असून ही फक्त सुरुवात आहे. आज भाजप मित्रपक्षांप्रती जरी ‘ए दोस्ती हम नही छोडेंगे’ ची भावना दाखवत असले तरी उद्या मित्रपक्षांची भावना भाजपाबाबत “जा बेवफा जा हमे…” याहून वेगळी असणार नाही हे नक्की आहे. त्यामुळे आपलीच भाजपकडून शिकार होऊ नये यासाठी मित्रपक्षांनी अधिक काळजी घेणंच उचित राहील, असे देखील त्यांनी म्हटले आहे.

एकनाथ शिंदे टार्गेट?

रोहित पवार यांनी आपल्या ट्विटमध्ये कोणत्या राजकीय पक्षाचे अथवा नेत्याचे नाव घेतलेले नाही. मात्र, त्यांचा इशारा एकनाथ शिंदेंच्या शिवसेनेकडे असल्याचा अंदाज वर्तवला जात आहे. ऑपरेशन टायगर करत शिंदे आपल्या पक्षाची ताकद वाढवू पाहत आहेत. ऑपरेशन टायगरसंदर्भातील बातम्यांमध्ये तथ्य नसल्याचे स्वःता एकनाथ शिंदेंनी सांगितले आहे. मात्र, ठाकरेंची शिवसेना फोडून खासदारांची संख्या वाढवत सत्तेत अधिक वाढण्याचा प्लॅन शिंदेंच्या शिवसेनेकडून असल्याचे म्हटले आहे.