Eknath Shinde : पुतळा कोसळल्याप्रकरणी CM शिंदेंचा मोठा निर्णय, नौदलाचे अधिकारी पवन धिंगरांवर 'ही' जबाबदारी

Eknath Shinde News : मालवणमधील राजकोट किल्ल्यावरील छत्रपती शिवाजी महाराजांचा पुतळा कोसळल्यानंतर CM एकनाथ शिंदे 'अ‍ॅक्शन मोड'वर आहेत. या प्रकरणात गुन्हा दाखल झाल्यानंतर या दुर्घटनेच्या संदर्भात चौकशी समिती नियुक्ती करण्यात आली आहे.

भारतीय नौदलाचे तज्ज्ञ कमांडर पवन धिंगरा यांच्या अध्यक्षतेखाली चौकशी समिती गठीत करण्यात आली आहे. या समितीत सार्वजनिक बांधकाम विभागाचे सचिव तसेच मुंबई आयआयटीमधील तज्ज्ञांचा समावेश आहे.

छत्रपती शिवाजी महाराजांच्या पुतळ्याबाबत झालेल्या दुर्घटनेची नेमकी कारण काय? याचा शोध ही समिती लावणार आहे. तसेच या दुर्घटनेमागील दोषी निश्चित करणे आदी काम या समितीचे असणार आहे. तांत्रिक समितीने नेमून दिलेले काम करत या समितीला राज्य सरकारला आपला अहवाल सादर करावा लागणार आहे.

पुतळा उभारण्यासाठी समिती

मुख्यमंत्री एकनाथ शिंदे यांनी पुन्हा छत्रपती शिवाजी महाराज यांचा पुतळा पुन्हा उभारण्यासंदर्भात घोषणा केली होती. त्यानुसार सार्वजनिक बांधकाम विभागाच्या अपर मुख्य सचिव मनीषा पाटणकर-म्हैसकर यांच्या अध्यक्षतेखाली समिती नेमली आहे. या समितीमध्ये सर्वाजनिक बांधकाम विभागाचे सचिव, भारतीय नौदलाचे अधिकारी, आआयटी मुंबईतील प्राध्यापक तसेच इतिहास अभ्यासक यांचा समावेश आहे.

अंबादास दानवेंचे समितीवर सवाल

विधान परिषद विरोधी पक्षनेते अंबादास दानवे यांनी ट्विट करत सरकारने नेमलेल्या समितीवर प्रश्नचिन्ह लावले आहे. 'वास्तूविशारद आणि शिल्पकार या दोन भिन्न गोष्टी आहेत. ज्या लोकांचे नाव या समितीमध्ये घेतले आहे, त्या लोकांनी कधी साधा मातीचा गणपती तरी हाताने बनवला आहे का? ते पडलेल्या शिल्पाचा अभ्यास करण्यास पात्र आहेत का?', असा सवाल चौकशी समितीवर दानवे यांनी उपस्थित केला आहे.