Shiv Sena election campaign : विधानसभा निवडणुकीपेक्षाही नगरपालिका निवडणुकीत महायुती प्रचारात सक्रिय होऊन, रंग भरला आहे. महायुतीमधील मित्र पक्ष एकमेकांवर कुरघोडी करत दिसत आहेत. भाजप गजचालीत, तर त्यांचे दोन मित्र पक्ष एकनाथ शिंदे यांची शिवसेना आणि अजित पवार यांची राष्ट्रवादी काँग्रेस दमछाक होईपर्यंत प्रचारात पळत सुटली आहे.
हीच दमछाक टाळण्यासाठी एकनाथ शिंदे यांनी या निवडणुकीत नवा फंडा आणला. भर सभेतून मंत्र्यांना फोन लावून मतदारांवर 'मोहिनी' घालण्याचा प्रयत्न करत आहेत. पण त्यांच्या या फंड्यांची, पॅटर्नची विरोधकांकडून चिरफाड होत आहे. विशेष म्हणजे, मित्रपक्ष देखील त्यांच्या या फंड्यावर टीका करत आहेत.
एकनाथ शिंदे (Eknath Shinde) यांनी नगरपालिका प्रचारात एवढे सक्रिय झाले आहे की, पळत सुटले आहे. मतदारांना आकर्षित करण्यासाठी भर प्रचार सभेतून त्यांच्या सहकारी मंत्र्यांना फोन लावण्याचा सपाटा सुरू केला आहे. पहिला फोन त्यांनी यवतमाळमधील पांढरकवडा इथल्या सभेतून उद्योग मंत्री उदय सामंत यांना 26 नोव्हेंबरला लावला. लोकांना इथं त्यांनी एमआयडीसीचा शब्द दिला. यानंतर याच दिवशी वणी इथल्या सभेतून प्रदूषण नियंत्रण मंडळाचे अध्यक्ष सिद्धेश कदम यांना फोन लावून इथं कोळशामुळे हवा आणि पाणी दूषित होते, तत्काळ कारवाईचा आदेश द्या, असा फोन लावला. समोर सिद्धेश कदम यांनी देखील 24 तासांत कार्यवाही सुरू करतो असे सांगितले.
हा पॅटर्न अन् फंडा रन होतोय, हे लक्षात आल्यावर शिंदे यांनी अहिल्यानगरमधील संगमनेर (Sangamner) इथं 27 नोव्हेंबरला सभा घेत, तिथं एमआयडीसीसाठी पुन्हा उद्योगमंत्री उदय सामंत यांना फोन लावला. सामंत यांनी देखील त्यावर आचारसंहिता संपताच नोटिफिकेशन काढतो, असे आश्वासन दिले. यानंतर शेवगावमध्ये 29 नोव्हेंबरला सभा घेत, पाणीपुरवठा योजनेसाठी पाणीपुरवठा मंत्री गुलाब पाटील यांना फोन लावला. मंत्री पाटील यांनी देखील आचारसंहितेनंतर काम होणार असल्याचे आश्वासन दिले.
उदगीर इथल्या 29 नोव्हेंबरच्या सभेत शिंदे यांनी आरोग्यमंत्री प्रकाश आबिटकर यांना फोन लावून रुग्णालयात सोनोग्राफी, एमआरआय मशीन उपलब्ध करून देण्याची मागणी केली. मंत्री आबिटकर यांनी देखील नक्कीच काम होईल, असे आश्वासन देऊन टाकले. हे सर्व फोन भर सभेत लावून माईकवर बोलून दाखवले. मी घोषणा केल्यासारखे करतो, तुम्ही मंजूर केल्यासारखे करा! असा हा दिसत पॅटर्न होता.
एकसारखा जेव्हा पॅटर्न येतो, तेव्हा तो ठरवून असतो, असे विश्लेषणकांचे म्हणणे असते. स्थानिकच्या निवडणूक थेट मतदारांशी संपर्क असतो. त्यांना प्रत्यक्ष काम हवे असते. शिंदेसाहेब स्वतः सत्तेत आहे. ते ही काम सभेतून फोन लावून मंजूर करून घेण्याच्या घोषणेपेक्षा थेट करून घेऊ शकतात. पण मतदारांना आकर्षित करण्यासाठी हा पॅटर्न आहे, हा पॅटर्न मतदारांपासून देखील लपलेला नाही, असेही विश्लेषणकांचे म्हणणे आहे.
शिंदे यांच्या या पॅटर्नवर विरोधकांसह त्यांच्या मित्र पक्षांकडून टीका होऊ लागली आहे. अहिल्यानगरमधील संगमनेरमधील एमआयडीसी मंजूरच्या शिंदेंच्या फोन पॅटर्नवर थोरात जोरदार बरसले. 'जिथं जातील तिथं एमआयडीसी मंजूर करतात. लोक म्हंटले की, थोडं पाणी पाहिजे, ते म्हणतात धरण मंजूर. धरणाला नदी नाही, नदी मंजूर. नदीला पाणी नाही, डोंगर मंजूर, असे म्हणत निवडणुकीत बनवाबनवी करायची यांना सवय झाली आहे. पण आता अशी ही बनवाबनवीचा कार्यक्रम चालणार नाही. लोकांच्या लक्षात आलं आहे,' असा टोला थोरातांनी एकनाथ शिंदेंना लगावला.
एकनाथ शिंदेंच्या भर सभेतून मंत्र्यांना लावत असलेल्या फोनवर शिवसेना उद्धव बाळासाहेब ठाकरे सेना पक्षाच्या उपनेत्या प्रा. सुषमा अंधारे यांनीही टोला लगावला आहे. 'आम्हाला एकनाथ शिंदे अन् उदय सामंत यांच्यासारखं फोनवर नकली बोलायची गरज नाही,' अशी टीका त्यांनी केली.
एकनाथ शिंदे यांच्या या फोन पॅटर्नवर निवडणूक आयोग रिप्रेझेंटेशन आॅफ पीपल्स अॅक्ट 1951च्या कलम 123नुसार कारवाई होईल, असे कायदेतज्ज्ञांचे म्हणणे आहे. या कायद्याच्या कमल 126नुसारही प्रचार संहितेचा नियमभंग म्हणून कारवाई होऊ शकते. आयोग प्राथमिक तपास करून, तत्काळ कारणे दाखवा नोटीस देऊ शकते. तोंडी किंवा लेखी इशाराही देऊ शकते, असे कायदेतज्ज्ञांचे म्हणणे आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.