Supriya Sule : सुप्रिया सुळे पुन्हा केंद्रातील वजन वापरणार; थेट अमित शहा अन् शिवराजसिंह चौहानांकडे टाकणार शब्द

Supriya Sule News : परतीच्या पावसाने झोडपल्याने मराठवाडा आणि विदर्भातील शेतकरी हवालदिल झाला आहे. पावसामुळे लाखो संसार उघड्यावर पडले आहेत. शेतकऱ्यांचं सर्वात जास्त नुकसान झालं आहे. याच पार्श्वभूमीवर महाराष्ट्रातील अतिवृष्टी आणि पूरग्रस्त शेतकऱ्यांना दिलासा देण्यासाठी शेतकऱ्यांची सरसकट कर्जमाफी करण्याची राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी केली आहे. मात्र याकडे फडणवीस सरकार गांभीर्याने पाहत नसल्याचा आरोप करत त्यांनी पुन्हा एकदा केंद्र सरकारकडे मदत मागण्याचा निर्णय घेतला आहे.

सुप्रिया सुळे कामानिमित्त राजधानी दिल्लीत आहेत. यावेळी त्यांनी केंद्रीय गृहमंत्री अमित शाह आणि केंद्रीय कृषीमंत्री शिवराजसिंह चौहान यांच्याकडे भेटीसाठी वेळ मागितली आहे. सरकारने तातडीने ओला दुष्काळ आणि सरसकट कर्जमाफी करावी, या मागण्यांविषयी त्या चर्चा करणार असल्याचे सांगितले जाते. यापूर्वीही सुप्रिया सुळे यांच्यासह राष्ट्रवादी काँग्रेस शरदचंद्र पवार पक्षाच्या सर्व खासदारांनी अमित शाह यांची भेट घेतली होती. त्यावेळीही त्यांनी शेतकऱ्यांची सरसकट कर्जमाफी करावी अशी मागणी केली होती. आता अतिवृष्टीच्या पार्श्वभूमीवर त्यांनी पुन्हा एकदा शाह यांची वेळ मागितली आहे.

मंगळवारी कोल्हापूरमध्ये बोलताना सुप्रिया सुळे यांनी यापूर्वीच्या भेटीबद्दल माहिती दिली होती. राज्याचे मुख्यमंत्री देवेंद्र फडणवीस यांनी वेळ न दिल्यामुळे थेट अमित शहांची भेट घेत राज्य सरकारला सूचना देण्याची विनंती केल्याची माहिती त्यांनी दिली होती. हे सरकार असंवेदनशील आहे. हे उघड्या डोळ्यांनी दिसत आहे. वर्षभरापूर्वी हे सरकार आम्ही सरसकट कर्जमाफी करू असं सांगत होतं. एक वर्ष होत आले तरी हे आश्वासन पूर्ण झाले नाही. शेतकऱ्यांचं कंबरडं या सरकारने मोडलं आहे, अशीही टीका त्यांनी केली होती.

सुप्रिया सुळे थेट केंद्रातील वजन वापरतात?

मुख्यमंत्री देवेंद्र फडणवीस हे वेळ देत नाही, असा सुप्रिया सुळे यांचा मागील काही दिवसांपासून आरोप आहे. राज्याचे मुख्यमंत्री वेळच देत नाहीत. तब्बल दहा वेळा वेळ मागूनही त्यांना भेट नाकारण्यात आली. याचा अर्थ काय? तर त्यांना वेळ द्यायचा नाही. पण मुख्यमंत्री वेळ देत नसले तरी आपली कामे दिल्लीतून होतात, असेही सुळे यांनी सांगितले होते. त्यानुसारच आता त्यांनी पुन्हा केंद्र सरकारमधील आपले वजन वापरण्याची तयारी केली असल्याचे दिसून येते.