Rashmi Shukla : मोठी बातमी : पोलिस महासंचालक रश्मी शुक्लांना पदावरून हटवले; निवडणूक आयोगाकडून झटका

Mumbai News: राज्यातील विधानसभा निवडणुकीची रणधुमाळी सुरू असतानाच राज्याच्या पोलिस महासंचालक रश्मी शुक्ला यांना पदावरून हटवण्यात आले आहे. केंद्रीय निवडणूक आयोगाने त्यांची बदली करण्याचा निर्णय घेतला आहे. आयोगाकडून राज्याच्या मुख्य सचिवांना याबाबत कळविण्यात आले आहे.

महाविकास आघाडीने शुक्ला यांना हटवण्याची मागणी निवडणूक आयोगाकडे काही दिवसांपूर्वी केली होती. त्यावेळी आयोगाकडून याबाबत कोणताही निर्णय घेण्यात आला नव्हता. सोमवारी मात्र आयोगाने शुक्ला यांना हटविल्याचा आदेश मुख्य सचिवांच्या कार्यालयात धडकला. निवडणुकीच्या पार्श्वभूमीवर आयोगाने हा सर्वात मोठा निर्णय घेतला आहे.

रश्मी शुक्ला पदावर असल्याचे निवडणूक प्रक्रिया पारदर्शकपणे पार पडणार नाही, असा आरोप महाविकास आघाडीच्या नेत्यांनी केला होता. यापार्श्वभूमीवर शुक्ला यांची करण्यात आलेली बदली महत्वाची मानली जात आहे.

दरम्यान, निवडणूक आय़ोगाने मुख्य सचिवांना दिलेल्या आदेशात शुक्ला यांची जागी त्यांच्यानंतरच्या वरिष्ठ आयपीएस अधिकाऱ्यांकडे तात्पुरता पदभार देण्यास सांगितले आहे. तसेच तीन अधिकाऱ्यांची नावे मंगळवारी दुपारी एक वाजेपर्यंत आयोगाकडे पाठवण्याचे आदेशही आयोगाने दिले आहेत.

2019 च्या विधानसभा निवडणुकीदरम्यान तसेच सत्ता स्थापनेच्या शुक्ला यांनी आपले फोन टॅपिंग केल्याचा आरोप महाविकास आघाडीतील नेत्यांनी केला होता. आघाडीची सत्ता आल्यानंतर शुक्ला यांना हटवण्यात आले होते. महायुतीची सत्ता आल्यानंतर शुक्ला यांना राज्याचे पोलिस महासंचालक करण्यात आले होते. काही महिन्यांपूर्वीच त्यांची मुदत संपली आहे. त्यानंतर त्यांना मुदतवाढ देण्याचा निर्णय सरकारने घेतला होता.