Ahilaynagar Ward Delimitation: अहिल्यानगर महापालिकेत प्रभाग वाढणार; रचना बदलणार असल्याने इच्छुकांच्या घाई गडबडीला ब्रेक!

Ahilaynagar Municipal Corporation: महापालिका, नगर परिषदा आणि नगर पंचायतींच्या प्रभाग रचना तयार करण्याची कार्यवाही तातडीने सुरू करण्याचा आदेश निवडणूक आयोगाने राज्य सरकारला नुकताच दिला. त्यानुसार आता राज्य सरकारच्या नगर विकास विभागाने ‘ड’ वर्ग महापालिकांना प्रारूप प्रभाग रचना तयार करण्याचा आदेश दिला आहे.

महापालिका आयुक्तांनी प्रारूप प्रभाग रचना तयार करून ती जिल्हाधिकाऱ्यांना सादर करणार आहेत. यानुसार अहिल्यानगर महापालिका प्रारूप प्रभाग रचना करण्याच्या तयारीला लागली असून, दोन ते तीन प्रभाग नव्याने वाढण्याची शक्यता वर्तवली जात आहे. यामुळे सध्याच्या प्रभागांच्या रचनेत फेरबदल होण्याचे संकेत मिळाल्याने इच्छुकांच्या तयारीचा गोंधळ उडाला आहे.

अहिल्यानगर महापालिकेची 2018 मध्ये 17 प्रभागांसाठी निवडणूक पार पडली होती. एका प्रभागात चार याप्रमाणे 68 नगरसेवक नगरकरांनी निवडून दिले होते. आता पुन्हा एकदा या निवडणुकीचे (Election) बिगुल वाजले आहे. प्रभाग रचना तयार करण्याचा आदेश राज्य निवडणूक आयोगाने काही दिवसांपूर्वीच राज्य सरकारला दिले होते. परंतु यासंदर्भात महापालिकांना कोणतेही आदेश प्राप्त झालेले नव्हते.

नगर विकास विभागाने राज्यातील ‘ड’ वर्ग महापालिकांना (Corporation) प्रारूप प्रभाग रचना तयार करण्याचे आदेश दिले आहेत. अहिल्यानगर महापालिकेला देखील हा आदेश प्राप्त झाला आहे. त्यानुसार ही प्रारूप प्रभाग रचना तयार करण्याचा अधिकार आयुक्त तथा प्रशासक यशवंत डांगे यांना आहेत.

आयुक्त डांगे यांनी तयार केलेली प्रारूप प्रभाग रचना जिल्हाधिकारी डॉ. पंकज आशिया यांना सादर करावी लागणार आहे. त्यानंतर या प्रारूप प्रभाग रचनेवर हरकती मागवल्या जाणार आहेत. त्यानंतर जिल्हाधिकारी यांच्यामार्फत ही प्रारूप प्रभागांची यादी राज्य निवडणूक आयोगाला सादर करण्यात येणार आहेत.

दरम्यान, अहिल्यानगर शहरात वाढीव मतदारांची संख्या गृहीत धरल्यास दोन ते तीन प्रभाग नव्याने वाढण्याची शक्यता आहे. त्यावर अनेकांचे राजकीय भवितव्य ठरणार आहे. त्यामुळे इच्छुक उमेदवारांच्या आशा पल्लवित झाल्या आहेत. अहिल्यानगर महापालिकेत गेल्या दीड वर्षापासून 'प्रशासक राज' सुरू आहे.