Maharashtra Cabinet Extension : विखेंचा मंत्रिमंडळात समावेश निश्चितच; महसूल खाते कायम राहणार का?

Ahilyanagar News : भाजपचे अहिल्यानगर जिल्ह्यातील दिग्गज नेते राधाकृष्ण विखे यांना नागपूर येथे शपथ घेण्यास उपस्थित राहण्याचे निमंत्रण देण्यात आले आहे.

मुख्यमंत्री देवेंद्र फडणवीस यांच्या मुंबईतील सागर निवासस्थानी विखेंनी शनिवारी सायंकाळी भेट घेतली. तिथेच फडणवीस यांनी विखेंना मंत्रिमंडळात समावेश निश्चित केला. तसेच विखेंना नागपूरमध्ये शपथ घेण्यास उपस्थित राहण्याचे निमंत्रण दिले.

मुख्यमंत्री देवेंद्र फडणवीस (Devendra Fadnavis) यांच्याकडून मंत्रिमंडळात समावेशाचे निश्चित झाल्यानंतर आणि शपथ घेण्याचे निमंत्रण मिळाल्यानंतर राधाकृष्ण विखे यांनी राहाता इथं येत, श्रीक्षेत्र निझर्णीश्वराचे दर्शन घेतले. तसेच लोणी बुद्रुक इथं ग्रामदैवत श्री म्हसोबा महाराजांच्या यात्रोत्सवात सहभागी होत दर्शन घेतले. यात्रेनिमित्ताने काढण्यात आलेल्या काठीची विधीवत पूजा राधाकृष्ण विखे आणि माजी खासदार सुजय विखे यांच्या हस्ते झाली. यानंतर साईदरबारी हजेरी लावत विखेंनी साईसमाधीचे दर्शन घेऊन ते, नागपूरला रवाना झाले आहेत.

राधाकृष्ण विखे 1995 ते 2024 या कालावधीत शिर्डी (Shirdi) विधानसभा मतदारसंघाचे सलग प्रतिनिधित्व करत आहेत. मतदारसंघातून ते सलग आठव्यांदा निवडून आले आहेत. यापूर्वी त्यांनी कृषी, शालेय शिक्षण, विधी व न्याय, विरोधी पक्षनेते, गृहनिर्माण, महसूल, पशुसंवर्धन आणि दुग्धव्यवसाय मंत्री म्हणून कामकाज संभाळले आहे. नवीन होणाऱ्या मंत्रिमंडळात त्यांच्याकडे महसूल खाते कायम राहणार का? याकडे सर्वांचे लक्ष लागले आहे.

राधाकृष्ण विखे यांनी नागपूरला रवाना होण्यापूर्वी माध्यमांशी संवाद साधला. ते म्हणाले, "राज्यातील जनतेने महायुती सरकारला मोठे पाठबळ दिले आहे. बहुमत दिले आहे. यामुळे सरकारची जबाबदारी वाढली आहे. जनेतच्या मानतील अपेक्षा पूर्ण करण्याला सरकारचे पहिले प्राधान्य राहील. देवेंद्र फडणवीस यांनी जाहीर केलेल्या पहिल्या 100 दिवसांच्या कृती आराखड्याच्या कार्यक्रमाची संपूर्ण अंमलबजावणी करण्याचे उद्दिष्ट आम्ही पूर्ण करणार आहोत".

अहिल्यानगर जिल्ह्यातील विकासाला गती देण्याचे पहिले प्राधान्य राहणार आहे. औद्योगिक विकास आराखडा तयार आहे. त्यावर अधिक काम करणार आहोत. तसेच पुण्यश्लोक अहिल्यादेवी होळकर यांच्या जयंती दिनाला यंदा तीनशे वर्ष पूर्ण होत आहेत. यानिमित्ताने केंद्र आणि राज्य सरकारच्या मदतीने त्यांचे स्मारक उभारले जाणार आहे. संत ज्ञानेश्वर सृष्टीची निर्मिती, गोदावरी कालव्याचे नूतनीकरण आणि निळवंडे कालव्याचे राहिलेले काम पूर्णत्वास नेण्याचे आपले उद्दिष्ट राहणार असल्याचे विखे यांनी सांगितले.