ST Bus Driver Suicide : चालकाने एसटी बसमध्येच घेतला गळफास; एसटी महामंडळात खळबळ...

Maharashtra ST Corporation News : अहिल्यानगरच्या सारोळा कसार इथले सुरेश चंद्रभान धामोरे (वय 54) यांनी गळफास घेतला. एसटी महामंडळाच्या अहिल्यानगर विभागात या घटनेनं खळबळ उडाली आहे. तोफखाना पोलिसांनी या घटनेची नोंद घेतली आहे. गळफास घेण्यामागे धक्कादायक, असे कारण पोलिसांच्या प्राथमिक तपासात समोर आलं आहे.

अहिल्यानगर शहरातील तोफखाना पोलिसांना तारकपूर आगारात उभ्या असलेल्या बसमध्ये (एमएच 40-क्यू 6018) एका व्यक्तीने गळफास घेतल्याची माहिती तोफखाना पोलिसांनी मिळाली. तोफखाना पोलिसांना चौकशीत सुरेश धामोरे, असे नाव आढळले. तसेच ही व्यक्ती एसटी महामंडळात (MSRTC) असून, ती चालक म्हणून काम करत असल्याची माहिती तोफखाना पोलिसांना मिळाली.

तोफखाना पोलिसांनी (Police) सुरेश धामोरे यांना जिल्हा रुग्णालयात दाखल केले. वैद्यकीय अधिकाऱ्यांच्या तपासणीत सुरेश धामोरे यांचा मृत्यू झाल्याचे निदान झाले. सुरेश धामोरे यांनी बसमध्येच गळफास घेतल्याची माहिती कर्मचाऱ्यांमध्ये खळबळ उडाली. तारकपूर आगारात कर्मचाऱ्यांनी गर्दी केली होती.

तोफखाना पोलिसांनी या घटनेची पार्श्वभूमी सांगताना, त्यातून धक्कादायक माहिती समोर आली. चालक सुरेश धामोरे यांच्याविरोधात बुधवारी गुन्हा दाखल झाला होता. वाहतूक नियंत्रक शिवाजी मारुती खजिनदार यांनी फिर्याद दिली होती. चालक सुरेश धामोरे हे तारकपूर-भोजपुरी बसवर कर्तव्यावर होते. तपासणीत त्यांनी मद्यप्रशासन केल्याचा संशय होता.

वरिष्ठांच्या आदेशानुसार त्यांची वैद्यकीय तपासणी करण्यात आली. त्यात त्यांनी मद्यसेवन केल्याचे आढळून आले. त्यामुळे दारूबंदी अधिनियमानुसार तोफखाना पोलिस ठाण्यात गुन्हा दाखल करण्यात आला.

हा गुन्हा दाखल झाल्यानंतर त्यांनी गळफास घेतला. यातूनच कारवाईच्या धक्क्याने किंवा बदनामीच्या भीतीने सुरेश धामोरे यांनी हे टोकाचे पाऊल उचलल्याची शंका व्यक्त केली जात आहे. याशिवाय अन् काही कारण आहे का? याची शोध तोफखाना पोलिस घेत आहे.