NCP warning to BJP : 'वाटेला गेला तर, विधानसभा सभागृहात देखील...'; भाजपच्या पडळकरांना अजितदादांच्या शिलेदारानं थेट सुनावलं

Tribal Reservation Maharashtra : उपमुख्यमंत्री अजित पवार यांच्या अकोले इथले आमदारक किरण लहामटे यांनी भाजप आमदार गोपीचंद पडळकर यांना चांगलाच दम भरला आहे.

"पडळकरची आमच्या नजरेत नजर घालून पहायची हिंमत नाही. आमशादादा आणि मी उभा असलो तर, तो कोसो मैलाने दूर जातो. आरक्षणाच्या प्रश्नावर आदिवासींच्या वाटेला गेला तर, त्याला विधानसभेच्या सभागृहात देखील सोडणार नाही," असा इशारा आमदार किरण लहामटे यांनी दिला आहे.

अहिल्यानगर जिल्ह्यातील राजूर इथं आद्यक्रांतीकारक राघोजी भांगरे यांच्या जयंती महोत्सवाच्या कार्यक्रमात आमदार लहामटे यांनी आरक्षणाच्या मुद्द्यावरून भाजपचे (BJP) आमदार गोपीचंद पडळकर यांच्यावर निशाणा साधला. आरक्षणाच्या प्रश्नावर आदिवासींच्या वाटेला गेला तर, त्याला विधानसभेच्या सभागृहात देखील सोडणार नाही, असा इशारा दिला आहे.

आदिवासी समाजाचे दैवत असलेल्या आद्यक्रांतीकारक राघोजी भांगरे यांची जयंती अकोले तालुक्यातील राजूर गावात मोठ्या उत्साहात पार पडली. राजूर गावात निघालेल्या मिरवणुकीत आदिवासी बांधवांनी आमदार किरण लहामटे यांना खांद्यावर उचलून घेत पारंपरिक नृत्यावर ठेका धरला.

आरक्षणाच्या (Reservation) मुद्द्यावरुन आमदार किरण लहामटे यांनी आमदार गोपीचंद पडळकर यांच्यासह धनगर आणि बंजारा नेत्यांवर निशाणा साधला. काहींना आदिवासींमध्ये येण्याचे डोहाळे लागलेत, मात्र आमच्यात कुणी येऊ शकत नाही, असे आमदार लहामटे यांनी ठामपणे सांगितलं.

आमदार लहामटे म्हणाले, "1978 सालापासून धनगर समाज आदिवासींमध्ये घुसखोरी करण्याचा प्रयत्न करतो आहे. . 2022 मध्ये उच्च न्यायालयाचा निकाल आपल्या बाजूने लागल्याने धनगरांचा आदिवासींमध्ये येण्याचा प्रश्न मिटला. निवडणुका जवळ आल्याने काहींना आदिवासींमध्ये येण्याचे डोहाळे लागलेत."

'आमच्या मागे भारतरत्न डाॅ. बाबासाहेबांची घटना आहे. एससी आणि एसटीला संविधानिक आरक्षण असून याच्यात कुणी येऊ शकत नाही. आरक्षणाच्या प्रश्नावर आदिवासींच्या वाटेला गेला तर, गोपीचंद पडळकराला विधानसभेच्या सभागृहात देखील सोडणार नाही,' असा इशारा आमदार किरण लहामटे यांनी दिला.