Dhule cash controversy: आश्चर्य...राज्यभर गाजलेल्या १.८४ कोटी रक्कम घोटाळ्याला धुळे पोलिसांनी ठरवली अदखलपात्र!

Anil Gote News: विधिमंडळ अंदाज समितीचा धुळे दौरा अद्यापही गाजतो आहे. शिवसेना एकनाथ शिंदे याचे नेते आणि समितीचे अध्यक्ष आमदार अर्जुन खोतकर या दौऱ्यात चांगलेच अडचणीत आले होते. मात्र पोलिसांनी त्यांना सावरण्यासाठी पुरेपूर मदत करण्याचा निश्चय केलेला दिसतो.

शिवसेना एकनाथ शिंदे पक्षाचे नेते आमदार अर्जुन खोतकर यांचे स्वीय सहाय्यक अनिल पाटील यांच्या खोलीत १.८४ कोटी रुपयांची बेहिशोबी रोकड सापडली होती. त्याबाबत माजी आमदार अनिल गोटे यांनी मुख्यमंत्र्यांपासून तर जिल्हा पोलीस प्रमुखांपर्यंत तक्रार केली होती. माजी आमदार गोटे यांनी विश्रामगृहावर स्टिंग ऑपरेशन करीत त्या खोलीला टाळे ठोकले होते.

त्यानंतर राज्यभर त्याची चर्चा झाल्यावर मुख्यमंत्री देवेंद्र फडणवीस यांनी एसआयटी स्थापन करण्याची घोषणा केली होती. जिल्हा पोलीस अधीक्षकांनी याबाबत तपासाचे आदेश दिले होते. ही रक्कम जप्त करण्यात आल्यावर, तीन आठवड्यांनी नुकताच अदखलपात्र गुन्हा दाखल करण्यात आला आहे. त्यामुळे सगळीकडे आश्चर्य व्यक्त होत आहे.

धुळे पोलिसांनी याबाबत सुरुवातीपासूनच अतिशय संथ गतीने तपास केल्याचा आरोप केला जातो. याबाबत माजी आमदार अनिल गोटे यांनी गंभीर आरोप केले आहेत. ही रक्कम सापडल्यावर पोलिसांना कळवूनही पोलीस खूप उशिरा घटनास्थळी दाखल झाले होते. सुरुवातीला तपास करण्याचीच टाळाटाळ झाली होती.

विधिमंडळ अंदाज समितीचे प्रमुख अर्जुन खोतकर आणि समितीचे सदस्य असलेल्या बारा आमदारांना वाटण्यासाठीच लाच म्हणून ही रक्कम जमा केली होती, असा दावा माजी आमदार गोटे यांनी केला आहे. यासंदर्भात बारा आमदारांना सह आरोपी करणे आवश्यक मात्र पोलीस याबाबत टाळाटाळ करीत असल्याची नाराजी त्यांनी व्यक्त केली.

पोलिसांनी हा तपास संथ गतीने आणि अदखलपात्र ठरवलं आहे. मात्र त्या विरोधात आपण आवाज उठवणार असून राज्यभरातील सर्व यंत्रणांना याबाबत पत्र लिहिणार आहोत. पोलिसांनी याबाबत १२ आमदारांवर कारवाई न केल्यास, त्या विरोधात प्रसंगी न्यायालयात जाण्याची तयारी असल्याचे आमदार गोटे यांनी सांगितले आहे.

विधानसभेचे अध्यक्ष राहुल नार्वेकर यांनी या प्रकरणात खोतकर यांचे स्वीय सहाय्यक अनिल पाटील यांना निलंबित केले आहे. शासकीय अधिकारी आणि कंत्राटदारांकडून ही रक्कम जमा केल्याची तक्रार यापूर्वीच करण्यात आली होती. मात्र एवढी मोठी रक्कम पोलिसांना हाती लागल्यावरही याचा तपास गांभीर्याने होत नसल्यामुळे गोटे यांनी नाराजी व्यक्त केली आहे.

यासंदर्भात आमदार गोटे राज्यातील गृहसचिव आणि अन्य अधिकाऱ्यांशी संपर्क करणार आहेत. तपासात संशय वाटल्यास न्यायालयात जाण्याची देखील तयारी त्यांनी ठेवली आहे. त्यामुळे आगामी काळात धुळे जिल्ह्यात शिवसेना उद्धव ठाकरे पक्षाला सत्ताधारी पक्षाच्या विरोधात एक चांगला मुद्दा हाती लागल्याचे चित्र आहे. आगामी स्थानिक स्वराज्य संस्थांच्या निवडणुकीतही हा मुद्दा गाजण्याची चिन्हे आहेत.

------