Eknath Khadse Politics: भुजबळ, विखे, पवारांवर कोण कोणत्या केसेस, तरी भाजपला चालतं कसं? खडसेंनी जोरदार खडसावलं!

Eknath Khadse News: जळगाव जिल्ह्यातील नगरपालिका निवडणुकांच्या प्रचारात चांगलीच रंगत भरली आहे. सत्ताधारी भाजपने विरोधकांची खिल्ली उडवली. त्याला विरोधकांकडूनही तेवढ्याच गतीने उत्तर दिले जात आहे.

भुसावळ नगरपालिका निवडणुकीत भारतीय जनता पक्षाच्या विरोधात विकास आघाडी संघर्ष करीत आहे. येथे भाजपला आव्हान देण्यासाठी माजी मंत्री एकनाथ खडसे आणि माजी आमदार संतोष चौधरी यांनी पॅनल तयार केले आहे. खडसे-चौधरी एकत्र आल्याने येथील राजकारण चांगलेच तापले आहे.

भ्रष्टाचारावरून पुन्हा एकदा एकनाथ खडसे यांनी मुख्यमंत्री आणि भाजपला घेरले. भाजप भ्रष्टाचाराच्या विषयावर दुटप्पी भूमिका घेतो. भ्रष्टाचारी नेत्यां समवेत मांडीला मांडी लावून बसतो, अशी टीका माजी मंत्री खडसे यांनी केली.

माजी मंत्री खडसे यांच्यावर भ्रष्टाचाराचे आरोप करण्यात आले. त्याचा समाचार खडसे यांनी घेतला. भारतीय जनता पक्ष आणि मुख्यमंत्री बोलतात तसे वागत नाहीत, अशी टीका त्यांनी केली.

माझ्यावर भ्रष्टाचाराचे आरोप करतात. मात्र भाजप कुठे चालला आहे याचे भान त्याला आहे का? सरकारमध्ये किती भ्रष्टाचारी नेते आहेत आणि त्यांच्याशी तुम्ही मांडीला मांडी लावून कसे बसतात? असा प्रश्न खडसे यांनी केला.

भाजपमध्ये सध्या भ्रष्टाचारी नेत्यांना घेण्याची स्पर्धाच लागली आहे. भ्रष्टाचार असेल तर तरच पक्ष उमेदवारी आणि पद देतो. विधानसभेची उमेदवारी हवी असेल तर किमान हजार कोटीचा भ्रष्टाचार हवा. कोणी सत्तर हजार कोटीचा भ्रष्टाचार करीत असेल तर, त्याला थेट उपमुख्यमंत्रीच केले जाते, असे खडसे यांनी अजित पवार यांचे नाव न घेता म्हटले आहे.

मंत्री छगन भुजबळ, राधाकृष्ण विखे पाटील, उपमुख्यमंत्री अजित पवार यांच्यावर ईडी, सीबीआय आणि कोण कोणत्या केसेस आहेत. यांच्याबरोबर भाजप सरकार चालवते आहे. भाजपच्या वॉशिंग मशीन मध्ये 70 हजार कोटींचा घोटाळा आहे स्वच्छ धुतला जातो. त्यांना सर्टिफिकेट सुद्धा दिले जाते, या शब्दात खडसे यांनी भाजपला घेरले.

भुसावळच्या जनतेने भाजपला ओळखावे. विरोधक सत्तेत आल्यास शहराचा निधी रोखू, या भाजपच्या भूलथापांना बळी पडू नये. सरकारची तिजोरी ही जनतेची आहे. त्यात जनतेचा निधी कोणीही रोखू शकत नाही, या शब्दात खडसे यांनी मतदारांना आवाहन केले.

-------