Mangesh Chavan Politics: ‘त्या’ पोलीस निरीक्षकावर आमदार मंगेश चव्हाण संतापले, दिला पोलिसांना इशारा...

Mangesh Chavan News: जळगाव जिल्हा नियोजन मंडळाची बैठक वेगळ्याच कारणाने गाजली. आमदार मंगेश चव्हाण यांनी एका पोलीस निरीक्षकाने आमदाराला गोळ्या घालीन असे विधान केल्याचा आरोप केला होता. या प्रकरणावरून आता आमदार चव्हाण कारवाईसाठी इरेला पेटले आहेत.

गुन्हे शाखेचे पोलिस निरीक्षक संदीप पाटील यांनी तक्रार देण्यात आलेल्या एका महिलेचे शोषण केल्याची तक्रार होती. याबाबत संबंधित पोलीस निरीक्षकावर कारवाई करण्यासाठी आमदार मंगेश चव्हाण यांनी हा प्रश्न थेट नियोजन समितीच्या बैठकीत उपस्थित केला होता. या प्रकरणाने जळगावच्या राजकारणात एकच खळबळ उडाली.

संबंधित पोलीस निरीक्षक पाटील यांच्यावर अद्यापही कारवाई न झाल्याने आमदार चव्हाण पुन्हा एकदा आक्रमक झाले आहे. बुधवारी त्यांनी थेट जिल्हा पोलीस अधीक्षक डॉ माहेश्वरी रेड्डी यांची भेट घेतली. अर्धा ते पाऊण तास बंद दारात त्यांची वादावादी आणि चर्चा सुरू होती. पोलीस निरीक्षक पाटील यांच्यावर कोणतीही कारवाई न झाल्याने आमदार ईरेला भेटले आहे.

आमदार चव्हाण यांनी पोलीस निरीक्षक पाटील यांचे कॉल रेकॉर्डिंग यापूर्वी सादर केले होते. संबंधित पोलीस निरीक्षक पालकमंत्री माझ्या खिशात आहेत. आमदाराला गोळ्या घालीन. असा संवाद असलेल्या या कॉल रेकॉर्डिंग वरूनही आमदार चव्हाण आक्रमक आहेत. एवढा गंभीर प्रकार असूनही पोलीस प्रशासन पोलीस निरीक्षकांना पाठीशी का घालतात असा त्यांचा सवाल आहे.

या प्रकरणावरून पुन्हा एकदा जळगावचे राजकारण तापले आहे. पोलिसांनी याबाबत कारवाई न केल्यास आपण स्वतः याबाबत कारवाई करू असा इशारा त्यांनी दिला. थेट पालकमंत्री आणि आमदारांविषयी वादग्रस्त विधाने करणाऱ्या पोलीस निरीक्षकाचे हे प्रकरण आता कोणत्या थराला जाते याची चर्चा आहे.

यासंदर्भात जिल्हा पोलीस अधीक्षक रेड्डी यांनी संबंधित पोलीस निरीक्षकाबाबत चौकशी करून अहवाल तयार केला आहे. अहवाल विशेष पोलीस महानिरीक्षकांना पाठविण्यात आला आहे. नाशिकचे विशेष पोलीस महानिरीक्षक दत्तात्रय कराळे या संदर्भात पुढील कारवाई करण्याची शक्यता आहे.

--------