Chhagan Bhujbal Politics: सिंहस्थ कुंभमेळा; छगन भुजबळांनी टोचले गिरीश महाजनांचे कान!

Chhagan Bhujbal News: सिंहस्थ कुंभमेळ्यासाठी प्रशासनाने विकास कामांचा हजारो कोटींचा आराखडा तयार केला आहे. मात्र सिंहस्थ कुंभमेळा साजरा करणे म्हणजे फक्त विकास कामे नव्हे, असे परखड मत छगन भुजबळ यांनी व्यक्त केले आहे. या माध्यमातून त्यांनी मंत्री गिरीश महाजन यांचेही कान टोचण्याचा प्रयत्न केला.

सिंहस्थ कुंभमेळ्यासाठी राज्य शासनाने स्वतंत्र प्राधिकरण तयार केले आहे. त्याचे काम मंत्री गिरीश महाजन यांच्यामार्फत पाहिले जात आहे. मंत्री महाजन यांनी सिंहस्थ कुंभमेळ्यासाठी रस्ते, पूल आणि तत्सम घोषणा केल्या आहेत. त्यावर हजारो कोटी रुपये खर्च होणार आहेत.

यासंदर्भात राज्याचे अन्न व नागरी पुरवठा मंत्री छगन भुजबळ यांनी रस्ते, उड्डाणपूलांची उभारणी म्हणजे सिंहस्थ कुंभमेळा नव्हे. कुंभमेळ्यासाठी कोट्यावधी भाविक येणार आहेत. ते रस्ते आणि पूल बांधण्यासाठी येणार नाहीत. गोदावरीत स्नान करण्यासाठी भाविक येणार आहेत. हे समजून घेतले पाहिजे, या शब्दात भुजबळ यांनी आपले परखड मत व्यक्त केले.

सिंहस्थ कुंभमेळा उत्तम प्रकारे करायचा असेल तर गोदावरी प्रदूषण मुक्त करणे हे मुख्य काम आहे. गोदावरी स्वच्छ करण्याचे काम तातडीने हाती घ्यायला पाहिजे. महापालिकेची मलनिस्सारण प्रकल्पांची कामे राजकीय नेत्यांमार्फत होत आहे, असा गंभीर प्रश्न देखील भुजबळ यांनी उपस्थित केला.

मला निसारण प्रकल्प चालविणारी राजकीय नेतेमंडळी फक्त नफा कसा मिळेल याचाच विचार करतात. त्यासाठी सांडपाण्यावर प्रक्रिया करण्याचा खर्च वाचविला जातो. पाण्यावर प्रक्रिया न करताच ते गोदावरीत सोडले जाते. त्यामुळे गोदावरी प्रदूषित होत आहे, असा नेमका निष्कर्ष भुजबळ यांनी मांडला आहे.

पुणे आणि मुंबई शहराशी तुलना करून उंच उंच इमारती उभारण्याकडे सध्या नाशिककरांचा कल दिसतो आहे. पण फक्त मुंबई आणि पुणे शहराचा विकास पाहतो. तेथील समस्या आणि त्यांचे स्वरूप विचारात घेत नाही. याचा देखील विचार केला पाहिजे. आपले नाशिक शहर मुंबई, पुण्यासारखे समस्याग्रस्त होता कामा नये, हा विचार रुजविणे महत्त्वाचे आहे.

अन्न व नागरी पुरवठा मंत्री छगन भुजबळ यांनी नाशिक शहराच्या समस्या नेमकेपणाने मांडल्या. विशेषता गोदावरी प्रदूषणावर त्यांनी नेमके निदान केले आहे. शहराच्या विकासासाठी आणि गोदावरी प्रदूषण मुक्त करण्यासाठी गिरीश महाजन त्याची दखल घेणार का? याची सगळ्यांनाच उत्सुकता आहे.

-------