Chhagan Bhujbal News : संभाजी भिडे यांचे नाव मनोहर कुलकर्णी आहे की नाही?

Nashik News : संभाजी भिडे यांचे नाव मनोहर कुलकर्णी आहे की नाही, हे स्पष्ट करावे. ते जर मनोहर कुलकर्णी आहे, तर संभाजी नाव घेण्याची आवश्यकता का भासली? असा परखड सवाल राज्याचे अन्न व नागरी पुरवठा मंत्री छगन भुजबळ यांनी केला. (Chhagan Bhujbal criticized New generation on Education)

मंत्री भुजबळ यांनी (Chhagan Bhujbal) काल (Nashik) वृत्तवाहिन्यांशी संवाद साधला. यावेळी त्यांनी आपण शिंदे-फडणवीस (Devendra Fadanvis) सरकारमध्ये सहभागी झालो, याचा अर्थ मी माझी भूमिका बदलली असा होत नाही.

यावेळी त्यांनी संभाजी भिडे प्रकरणावर आपली भूमिका स्पष्ट केली. ते म्हणाले, संभाजी भिडे यांचे नाव मनोहर कुलकर्णी आहे. मग त्यांनी संभाजी हे नाव का लावले? हा अनेकांना पडलेला प्रश्न आहे. हे नाव घ्यायचं आणि बहुजन समाजात जायचं हे योग्य नाही.

संभाजी भिडे काय काय करतात, ते कोणत्या विचारांचा प्रसार करतात, हे तुम्हाला व सगळ्यांना माहीत आहे. त्यांचे हे असं असेल, तर आम्ही त्याला विरोध करणार. मी ज्या जातीत जन्माला आलो, त्या जातीत शिवाजी, संभाजी, धनाजी अशी सगळी नावे आहेत. जे कोणी लोकं संभाजी भिडे यांची बाजू घेतात, त्यांनी स्वतः याबाबत स्पष्टीकरण द्यावं, असे आव्हान भुजबळ यांनी दिले.

मी सध्या शिंदे-फडणवीस यांच्या सरकारमध्ये सहभागी झालो आहे. याचा अर्थ मी माझी मुळ भूमिका बदलली असे कोणीही समजू नये. आपल्याला शिक्षणाची कवाडे सावित्रीबाई फुले, महात्मा फुले, फतिमाबी, छत्रपती शाहू महाराज, डॉ. बाबासाहेब आंबेडकर आदींनी खुली केली. त्यामुळे ज्यांनी कोणाला शिकवलेच नाही, त्यांचे फोटो लावण्याचे काय प्रयोजन?. याचा जरूर विचार झाला पाहिजे.