Operation sindoor: छगन भुजबळ यांची सुचक प्रतिक्रीया, ... मात्र आपल्याला तयार रहावे लागेल!

India Air Strike: पहलगाम पर्यटकांवर झालेल्या दहशतवादी हल्ल्याला भारताने चोख प्रत्युत्तर दिले आहे. या कारवाईबद्दल माजी उपमुख्यमंत्री छगन भुजबळ यांनी भारतीय लष्कराचे अभिनंदन केले आहे. या स्थितीत देशातील सगळ्यांनीच एकसंघपणे सरकारच्या पाठीशी उभे राहावे, असेही ते म्हणाले.

पाकव्याप्त काश्मीरमध्ये दहशतवादी तळांवर भारतीय हवाई दलाने आज पहाटे हल्ला केला. भारतीय हवाई दलाच्या या हल्ल्यात विविध ठिकाणी दहशतवादी तळांचे मोठे नुकसान झाले आहे. यामध्ये केवळ दहशतवाद्यांना टार्गेट करण्यात आले होते, असे माजी उपमुख्यमंत्री छगन भुजबळ म्हणाले.

या संदर्भात श्री. भुजबळ यांनी पंतप्रधान नरेंद्र मोदी आणि भारतीय लष्कराचे अभिनंदन केले आहे. सबंध विरोधी पक्ष विशेषता काँग्रेस नेते राहुल गांधी आणि महाराष्ट्रातील शरद पवार यांनी याप्रसंगी केंद्र सरकारला खंबीर पाठिंबा व्यक्त केला आहे. या निमित्ताने भारत एकसंघ असल्याचा संदेश जगभर गेला आहे असे, भुजबळ म्हणाले.

दहशतवाद्यांनी धर्म विचारून पर्यटकांना गोळ्या घातल्या. भारतीय लष्कराने मात्र पाकिस्तानच्या सामान्य नागरिकांना त्रास होईल असे काहीही करणे टाळले. हवाई दलाकडून केवळ दहशतवाद्यांनाच टार्गेट करून हल्ला करण्यात आलेला आहे. हे आपल्या भारतीय लष्कराचे वैशिष्ट्य आहे.

पहलगाम दहशतवादी हल्ल्यानंतर बाष्कळ बडबड करणाऱ्या पाकिस्तानचे सरकार आणि लष्कराला भारताने चोख उत्तर दिले आहे. मात्र यापुढेही कारवाया होऊ शकतील. त्यामुळे केंद्र शासन ज्या ज्या सूचना करतील त्या सर्वांचे पालन नागरिकांनी करावे. आपल्याला यापुढेही तयार आणि तत्पर राहावे लागेल, असे भुजबळ म्हणाले.

या काळात धार्मिक अथवा अन्य अंतर्गत वाद बाजूला ठेवले पाहिजेत. कोणतेही तंटे बखेडे उभे राहतील, असे काम कोणीही करू नये. भारतीय समाज आणि त्यातील एकोपा याला विशेष महत्त्व आहे. हल्ला, प्रतिहल्ला ही कारवाई होतच राहणार आहे. त्यामुळे आपण सर्व यापुढे तयारीत राहिले पाहिजे.

------