ACB News: 5 लाखांची लाच स्वीकारणारा 'वाघ' ACBच्या पिंजऱ्यात! धुळ्यात लिपिकाकडून सुरू होता 14 महिने पैशांसाठी छळ

Dhule crime News: महाराष्ट्र सुरक्षा रक्षक मंडळात नियुक्तीच्या शिफारशीसाठी चक्क साडेपाच लाख रुपयांची मागणी करण्यात आली. लाच मिळत नसल्याने सुरक्षा रक्षकांना 14 महिन्यांपासून त्रास दिला जात होता.

धुळे येथील सुरक्षा रक्षकांना महाराष्ट्र सुरक्षा रक्षक मंडळात नियुक्तीची शिफारस हवी होती. त्यासाठी धुळे जिल्हा परिषदेच्या सार्वजनिक बांधकाम विभागाच्या लिपिकाने 14 महिने त्यांना तीष्ठत ठेवले. हे कर्मचारी कार्यालयाच्या फेऱ्या मारून दमले होते.

किमान सहा महिन्यांचा कामाचा अनुभव असलेल्या सुरक्षारक्षक वा अन्य कर्मचाऱ्यांना महाराष्ट्र सुरक्षा रक्षक मंडळात समाविष्ट केले जाते. त्यानुसार धुळे येथील पाच सुरक्षारक्षकांनी जिल्हा परिषदेकडे अर्ज केले होते. मात्र त्यांना काहीही प्रतिसाद मिळत नव्हता.

संबंधित कक्षातील लिपिक पुरुषोत्तम वाघ (वय ५०) याने या पाच सुरक्षारक्षकांकडून प्रत्येकी दीड लाख अशा साडेसात लाख रुपयांची मागणी सुरुवातीला केली. नंतर पैसे मिळत नसल्याने दीड वर्ष कर्मचाऱ्यांना तीष्ठत ठेवले. ते मिळाल्याशिवाय काम होणार नाही असे सांगितले.

कंटाळलेल्या या कर्मचाऱ्यांनी ५ लाख ८० हजार रुपये देण्याची तयारी दर्शवली. त्यातील एक लाख रुपयांची लाच लिपिक वाघ यांनी स्वीकारले. उर्वरित ४.८० लाख रुपये देण्यापूर्वी संबंधितांनी जळगावच्या लाचलूचपत प्रतिबंधक विभागाकडे तक्रार केली होती.

तक्रारीची शहनिशा आणि छाननी केल्यानंतर एसीबी पथकाने सापळा रचला. वाघ याने धुळे शहरातील हॉटेल ग्रीन पार्क येथे मध्यस्थ बारकू पाटील यांच्यामार्फत पैसे स्वीकारणार असल्याचे सांगितले.

त्यानुसार मंगळवारी एसीबीने सापळा लावला होता. यावेळी ४.८० लाख रुपये लाच घेताना मध्यस्थ पाटील आणि लिपिक वाघ याला अटक करण्यात आली. त्याच्या विरोधात धुळे पोलीस ठाण्यात गुन्हा दाखल करण्यात आला आहे.