Fake voting cards Dhule : मतदान प्रक्रियेला धक्का! धुळ्यात हजारो मतदान कार्ड सापडले; उमेदवारांची पुरती उडाली घाबरगुंडी, आयोग चौकशीत गुंतला

Dhule Municipal Election : राज्यात महापालिका निवडणुकीच्या मतदानाला अवघे काही तास शिल्लक राहिले असतानाच, धुळे इथं हजारो बोगस मतदान कार्डाचा साठा आढळला आहे. यामुळे उमेदवारांची पुरती घाबरगुंडी उडाली असून, हा साठा कोणाच्या मुळावर आणण्यासाठी आणला होता, याची चर्चा रंगली आहे. दरम्यान, महापालिकेचे आयुक्त नितीन कापडणीस याप्रकाराची गंभीर दखल निवडणूक आयोगाच्या आचारसंहिता कक्षाच्या पथकाला याच्या सखोल चौकशीचा आदेश दिला आहे.

धुळे शहरातील देवपूर भागात हजारो मतदान कार्ड बेवारस अवस्थेत सापडले. या कार्डविषयाची माहिती वाऱ्यासारखी शहरात पसरल्याने वेगवेगळ्या चर्चेला तोंड फुटलं आहे. या बोगस मतदान कार्डमुळे मोठी खळबळ उडाली असून, हा सर्व प्रकार 'AIMIM' पक्षाच्या पदाधिकाऱ्यांनी उघडकीस आणला आहे. या बोगस मतदान कार्डमागे 'AIMIM'ने थेट राष्ट्रवादी काँग्रेस पक्षावर निशाणा साधला आहे.

'AIMIM'च्या कार्यकर्त्यांनी हा साठा शोधून काढल्याने प्रशासनाच्या कारभारावर उमेदवारांकडून प्रश्नचिन्ह उपस्थित केले जाऊ लागले आहेत. इतक्या मोठ्या संख्येने मतदान कार्ड बाहेर कसे आले आणि त्याचा उद्देश काय होता, यावर वेगवेगळ्या चर्चांना तोंड फुटले आहे. मतदानाला अवघे काही तास राहिले असताना, ही बोगस मतदान कार्ड सापडल्याने निवडणुकीत संशयाचे वातावरण निर्माण झाले आहे.

या सर्व बोगस मतदान कार्डामागे राष्ट्रवादी काँग्रेसचा हात असल्याचा संशय 'AIMIM'ने संशय व्यक्त केल्याने अधिकच खळबळ उडाली आहे. यामुळे शहरातील राजकीय वातावरण देखील तापलं आहे.

'AIMIM'चे इर्शाद जहागीरदार यांनी आयुक्त नितीन कापडणीस यांची भेट घेत ही बोगस मतदान कार्ड त्यांच्या टेबलावर ठेवली आणि चौकशीची मागणी केली. ही बोगस कार्ड मतदानाच्या दिवशी वाटण्यात येणार होती का? यामागे राजकीय कटकारस्थान आहे, याची चौकशी झाली पाहिजे, अशी मागणी केली.

दरम्यान, महापालिका आयुक्त नितीन कापडणीस यांनी या प्रकाराची गंभीर दखल घेतली असून, निवडणूक आयोगाच्या आचार संहिता कक्षाचे प्रमुख यांना चौकशीचा आदेश दिला आहे. चौकशी करून तत्काळ अहवाल सादर करण्याचा सूचना आहे. यात कोणी दोषी आढळल्यास पोलिसांमार्फत कायदेशीर कारवाई केली जाईल, असाही इशारा नितीन कापडणीस यांनी दिला.

FAQs :

1. धुळ्यात नेमकं काय सापडलं आहे?
देवपूर परिसरात हजारो मतदान कार्ड बेवारस अवस्थेत आढळून आली आहेत.

2. हा प्रकार कोणी उघडकीस आणला?
AIMIM पक्षाच्या पदाधिकाऱ्यांनी हा प्रकार उघड केला आहे.

3. AIMIM ने कोणावर आरोप केला आहे?
राष्ट्रवादी काँग्रेस पक्षावर बोगस मतदान कार्डांचा आरोप केला आहे.

4. प्रशासनाने काय कारवाई केली आहे?
महापालिका आयुक्तांनी निवडणूक आयोगाच्या आचारसंहिता कक्षाला चौकशीचे आदेश दिले आहेत.

5. या प्रकरणाचा निवडणुकीवर काय परिणाम होऊ शकतो?
मतदार यादी व निवडणूक प्रक्रियेच्या पारदर्शकतेवर प्रश्न निर्माण होऊ शकतात.