Nilesh Lanke : '...तर राजीनामा देईल'; खासदार नीलेश लंके भर बैठकीत असं का म्हणाले?

Ahilyanagar News : जलजीवन मिशन योजनेतील कामात होत असलेल्या भ्रष्टाचारावर खासदार नीलेश लंके चांगलेच आक्रमक झाले आहेत. या योजनेत भ्रष्टाचार आढळला नाही, तर राजीनामा देईल, असं चॅलेंज खासदार लंकेंनी अधिकाऱ्यांना दिले.

जिल्हाधिकारी कार्यालयातील बैठकीत खासदार लंके यांनी घेतलेल्या या भूमिकेमुळे अधिकारी देखील गडबडले. जिल्हाधिकारी कार्यालयात वर्षभरानंतर जिल्हाविकास व संनियंत्रण समितीची (दिशा) बैठक झाली.

जलजीनव मिशन कार्यक्रमामध्ये मनमानी पद्धतीने कारभार सुरू असून, पाणी योजनेसाठी कोणतेही पाइप टाकले जात आहे. केवळ 20 टक्केच योजना भ्रष्टाचारमुक्त असू शकतील, टक्केवारीचे काम असेल, तर असेच होणार, अशा शब्दात खासदार लंके यांनी जिल्हाधिकारी कार्यालयात झालेल्या बैठकीत अधिकाऱ्यांना सुनावले.

या योजनेतील कामात भ्रष्टाचार झाल्याचे आरोप होत आहेत. याचा दाखला देत, या योजनेच्या कामात भ्रष्टाचार नसेल, तर राजीनामा देईल, अशी घोषणा देत खासदार नीलेश लंके यांनी अधिकाऱ्यांना चॅलेंज दिले. खासदार लंके यांनी अशी भूमिका घेताच, बैठकीतील अधिकारी देखील गडबडले.

जलजीवन योजनेतील कामाची जिल्हाधिकारी सिद्धाराम सालीमठ आणि जिल्हा परिषदेचे मुख्य कार्यकारी अधिकारी आशिष येरेकर यांनी प्रत्यक्ष लक्ष घालून करावी, अशी मागणी खासदार लंके यांनी केली. या योजनेच्या कामाच्या चौकशीसाठी संसदेत केंद्रीय समितीकडे मागणी केल्याचेही खासदार लंके यांनी सांगितले.

खासदार लंके म्हणाले, "आपण योजनेबद्दल अनेकदा लक्ष वेधले. काम नसताना देखील बिलं अदा झाली आहेत. पूर्ण झालेल्या 210 योजनांपैकी भ्रष्टाचार झाला नाही, असे कोठेही आढळत नाही. हाताने पाइप उकरले जाऊ शकतात". या योजनेसाठी कोट्यवधीचा निधी मिळाल्याचे सांगतो. पण हा निधी, पैसा पाण्यात जात आहे. या योजनेचे जिल्हाधिकारी आणि सीईओ यांनी 'स्पाॅट व्हेरिफिकेशन' करावे, अशी मागणी खासदार लंके यांनी केली.

खासदार भाऊसाहेब वाकचौरे यांनी काही ठिकाणी स्त्रोत नसताना देखील टाक्या उभारल्या जात आहेत. जलवाहिन्या टाकल्या गेल्या आहेत. योजनेमध्ये भलतेच पाइप टाकण्यात आले आहेत. काम झालेले नसताना देखील बिल अदा करण्यात आल्याची बाब गंभीर असल्याकडे देखील लक्ष वेधले.