Maratha Reservation: मराठा आंदोलनाचा 'लालपरी'नेही घेतला धसका; नगर एसटी मंडळाच्या बीड, धाराशिवच्या फेऱ्या रद्द

प्रदीप पेंढारे :

Ahmednagar News: कोणत्याही आंदोलनात सर्वात अगोदर टार्गेट होते, ती एसटी महामंडळाची बस! मराठा आरक्षणाची झळ एसटी महामंडळाने बसू लागली आहे. यामुळे एसटी महामंडळ सावध झाले आहे. सोमवारपासून मराठा आरक्षणाचे आंदोलन आणखी तीव्र होण्याची शक्यता आहे.

त्यामुळे एसटी महामंडळाचे सर्व विभाग जिल्हा पोलीस प्रमुखांच्या संपर्कात असून, फेऱ्यांचे नियोजन करत असल्याची माहिती समोर आली आहे. बीड आणि धाराशिवकडे नगरमधून जाणाऱ्या बसेसच्या फेऱ्या पुढील सूचनांपर्यंत रद्द करण्यात आल्या आहेत.

मराठा आरक्षणासाठी मराठा समाज आंदोलक राज्यात आक्रमक झाले आहेत. राज्यकर्त्यांना मराठा आंदोलक जाब विचारू लागले आहेत. ठिकठिकाणी साखळी उपोषण सुरू आहे. राजकीय नेत्यांना गावबंदी केली आहे. मराठा महिला देखील आंदोलनात उतरल्या आहेत. यवतमाळ जिल्ह्यात एसटी महामंडळाची बस रविवारी सकाळी पेटवली गेली. याचबरोबर बीड, धाराशिव, लातूर, नांदेड, यवतमाळ या जिल्ह्यात बस गाड्यांना टार्गेट केले जात आहे.

यामुळे नगर विभागातील बीड आणि धाराशिवकडे जाणाऱ्या बस फेऱ्या रद्द करण्यात आल्या आहेत. बीड आणि धाराशिव जिल्ह्याच्या पोलीस प्रमुखांनी नगर विभागाला पुढील सूचना येईपर्यंत बस फेऱ्या सुरू न करण्याच्या सूचना दिल्या आहेत. त्यामुळे नगर विभागाच्या बस गाड्या आज दिवसभरात सुमारे 3 हजार 800 किलोमीटरने कमी धावल्याची नोंद झाली आहे. या बस गाड्या रद्द झाल्याने जामखेड आणि आष्टी तालुक्यामधील प्रवाशांचे हाल झाले.

मराठा आरक्षणाच्या आंदोलनाचा सोमवारचा दिवस महत्त्वाचा आहे. या दिवशी आंदोलनाची पुढची दिशा ठरणार आहे. राज्य सरकारने मराठा आरक्षणाच्या उपसमितीची बैठक बोलवली आहे. या बैठकीत काय निर्णय होईल, याकडे सर्वांचे लक्ष लागले आहे.

यात मराठा आरक्षणाच्या पुढच्या आंदोलनाच्या दिशेवर मनोज जरांगे पाटील काय निर्णय घेतात, याकडे देखील लक्ष लागले आहे. जरांगे पाटील यांच्या निर्णयावर सकल मराठा समाज काय प्रतिक्रिया देईल, हे सांगता येत नाही. त्यामुळे एसटी महामंडळाचे राज्यातील सर्व विभागप्रमुख बसच्या फेऱ्यासंदर्भात नियोजन करत आहे. याशिवाय ते पोलीस प्रशासनाच्या संपर्कात असल्याची माहिती आहे.

Edited By- Ganesh Thombare