शिक्षणाधिकारी म्हणाले, `या विभागात आहे हे सांगताना लाज वाटते!`

नाशिक : पवित्र मानल्‍या जाणाऱ्या शिक्षण क्षेत्रात काम करत आहे. परंतु, नाशिक विभाग (Nashik) बदनाम झाला असून, या विभागात काम करत असल्‍याचे सांगताना लाज वाटते, अशी खंत शिक्षण (Education) उपसंचालक डॉ. भाऊसाहेब चव्‍हाण (Dr Bhausaheb Chavan) यांनी व्‍यक्‍त केली. आता विभागाची परिस्थिती बदलायची असून, पुढील काळात शिक्षकांनी त्यांच्या कामासाठी चिरीमिरी देण्याची आवश्यकता राहणार नाही, असे आश्‍वासन त्यांनी केले.

मुख्याध्यापक संघातर्फे सोमवारी झालेल्‍या क्रांतिवीर वसंतराव नारायणराव नाईक शिक्षण संस्थेच्या अभियांत्रिकी महाविद्यालयात झालेल्‍या सहविचार सभेत ते बोलत होते. सभेच्‍या अध्यक्षस्‍थानी पदवीधर मतदारसंघाचे आमदार डॉ. सुधीर तांबे होते. शिक्षण उपसंचालक श्री. चव्‍हाण म्‍हणाले, की अनेक वर्षांपासून विनाअनुदानित तत्त्वावर कार्यरत २९९ शिक्षकांचे शालार्थ आयडीचे प्रस्ताव रखडलेले आहेत.

जलदगतीने हे प्रस्‍ताव मार्गी लावण्याचा प्रयत्‍न असेल. शिक्षण विभागात बोगस स्वाक्षरी घेणे, स्वाक्षरी स्कॅनिंग करून वापरणे, असे गैरप्रकार घडणे दुदैवी आहे. अनेक वर्षांपासून पवित्र पोर्टल कार्यरत असतानाही शिक्षक भरती सुरू आहे. मागील तारखांची कामे यापुढे करणार नसल्याचा इशारादेखील त्‍यांनी दिला. कर्मचाऱ्यांनी वर्कशीट वापरणे, मेडिकल बिले निकाली काढण्यासाठी ‘फिफो’ चा वापर करण्याबाबतचे आदेश त्‍यांनी या वेळी दिले. पुढील सभेपूर्वी शिक्षण उपसंचालक, शिक्षणाधिकारी कार्यालयाच्या स्तरावरील प्रकरणे निकाली काढण्याचे आश्वासनही त्यांनी दिले. सहविचार सभेप्रसंगी वेतन पथक अधीक्षक उदय देवरे, माध्यमिक शिक्षण विभागाचे अधीक्षक सुधीर पगार, ए. आर. बागूल यांनी उपस्‍थित शिक्षकांच्या प्रश्नांना उत्तरे दिली.

शासनाचे मार्गदर्शन मागविले

दरम्‍यान, तुकाराम सुपे याला अटक झाल्‍यामुळे नाशिक शिक्षण विभागातील शालार्थ आयडीचे प्रस्‍ताव पाठविण्याबाबत अडचण उद्भवत असल्‍याचे अशी विचारणा करण्यात आली. यास उत्तर देताना राज्य शासनाचे मार्गदर्शन मागविल्याचे शिक्षण उपसंचालक श्री. चव्हाण यांनी नमूद केले.

----