Shani Shingnapur temple employees arrested : श्री शनैश्वर देवस्थान बनावट अ‍ॅपप्रकरणी दोघांना अटक; सुरुवात कर्मचाऱ्यांपासून...

Shani Shingnapur fake app case : राज्यासह देशात चर्चेत असलेला आणि विधिमंडळाच्या मागील अधिवेशनात गाजलेला शनिशिंगणापूर इथल्या श्री शनैश्वर देवस्थानच्या अ‍ॅप घोटाळ्याप्रकरणी अहिल्यानगरमधील सायबर पोलिसांनी कारवाई करत देवस्थानच्या दोघा कर्मचाऱ्यांना गुरूवारी रात्री अटक केली.

सचिन शेटे आणि संजय पवार, अशी अटक केलेल्यांची नावे असून, या दोघांना आज न्यायालयात हजर केले जाणार आहे.

अ‍ॅप घोटाळ्याप्रकरणी शनिशिंगणापूर पोलिस ठाण्यात सायबर पोलिसांनी गुन्हा (cyber crime) दाखल केला. पोलिस अधीक्षक सोमनाथ घार्गे यांच्या मार्गदर्शनाखाली पोलिस निरीक्षक सागर ढिकले या गुन्ह्याचा तपास करत आहेत. देवस्थानच्या अधिकृत परवानगीतील तीन अ‍ॅप व्यतिरिक्त आणखी चार बेकायदेशीर अ‍ॅप आढळून आले.

या माध्यमातून जमा झालेल्या देणग्यांपैकी काही निधी दोघा कर्मचाऱ्यांच्या वैयक्तिक बँक खात्यात वळवला गेल्याचे पोलिस तपासात उघड झाले. पोलिसांनी (Police) देवस्थान विश्वस्त, कर्मचारी व पुजाऱ्यांची चौकशी केली आहे. संशयास्पद व्यवहार झालेली बँक खाती तपासली असून अ‍ॅपच्या माध्यमातून पैशांची आवक-जावक कशी झाली, कोणाकडे निधी पोहोचला याची माहिती घेतली आहे.

दरम्यान सचिन शेटे व संजय पवार या दोघांकडे सायबर पोलिसांनी चौकशी केली व त्यांना गुन्ह्यात अटक करण्यात आली आहे. त्यांच्या चौकशीत काय समोर येणार यावर गुन्ह्याचा पुढचा तपास ठरणार आहे. उशिरा का होईना पण सायबर पोलिसांनी या गुन्ह्यात दोघांना अटक केली असल्याने पुढील तपासाला गती येणार आहे. या दोघांना आज न्यायालयासमोर हजर केले जाणार असल्याचे पोलिसांनी सांगितले.

न्यायालयासमोर हजर केले जाणार असल्याचे पोलिसांनी सांगितले. काँग्रेसचे संभाजी माळवदे , भाजपचे ऋषिकेश शेटे, वैभव शेटे यांनी या बनावट अ‍ॅपसंदर्भात सुरुवातीला आवाज उठवला. ज़िल्हा पोलिस अधीक्षकांकडे तक्रारी अर्ज दाखल केले. देवस्थानामधील बनावट ॲप प्रकरण व यामध्ये कोट्यवधींचा घोटाळाप्रकरणात सायबर शाखा पोलिसांनी शनिशिंगणापूर पोलिस ठाण्यात गुन्हा दाखल केला.