Fadanvis on Police : फडणवीसांचा पोलिसांना सल्ला, प्रलोभनांना बळी पडू नये!

Nashik Police News : काळाची गरज लक्षात घेउन आणि माहिती तंत्रज्ञान आत्मसात करून सायबर व आर्थिक गुन्हेगारी मोडीत काढण्यासाठी सज्ज व्हावे, असे आवाहन उपमुख्यमंत्री फडणवीस यांनी केले.

उपमुख्यमंत्री देवेंद्र फडणवीस (Devendra Fadanvis) यांच्या उपस्थितीत महाराष्ट्र (Maharashtra) पोलिस अकादमीच्या पोलिस (Police) उपनिरीक्षकांच्या १२२ व्या तुकडीचा दीक्षान्त समारंभ नाशिक येथे झाला.

यावेळी फडणवीस यांनी प्रशिक्षण पूर्ण केलेल्या अधिकाऱ्यांना संदेश दिला. ते म्हणाले, आपल्या जीवनात अनेक प्रलोभने येतील. परंतु, त्या प्रलोभनांना बळी न पडता आज याठिकाणी आपण घेतलेल्या शपथेचे स्मरण त्या वेळी करावे. पद, प्रतिष्ठा, पैसा मिळेल; परंतु त्याबरोबरच आपली समाजाप्रती असलेली संवेदना कायम जिवंत ठेवा.

समाजातील दुखावलेला, अन्यायग्रस्त घटक तुमच्याकडे येईल, त्या वेळी तुमच्यात असणाऱ्या संवेदना जिवंत असायला हव्यात, त्यासाठी आपण पोलिस सेवेचे व्रत पत्करले आहे, याचीही जाणीव असावी.

फडणवीस म्हणाले, समाजातील चांगल्या प्रवृत्तींचे रक्षण करून वाईट प्रवृत्तींचा बीमोड करणे ही आपली आद्य जबाबदारी आहे. भारतीय संविधानाने आपल्या सर्वांना समान दर्जा दिला असून, कर्तव्य पार पाडताना कोणत्याही प्रलोभनांना बळी न पडता भारतीय संविधानाची घेतलेली शपथ निभावण्यासाठी कायम प्राधान्य द्यावे.