Jalgaon politics : जिल्ह्यात भाजप मजबूत म्हणता, मग फोडाफोडीचा खेळ का? उन्मेष पाटलांचा हल्लाबोल

Unmesh Patil : जळगाव महानगरपालिका निवडणुकीसह इतर स्थानिक स्वराज्य संस्थांच्या निवडणुकीत भाजपला रोखण्यासाठी समविचारी पक्षांना सोबत घेऊन, लढण्याचा संकल्प शिवसेना उद्धव बाळासाहेब ठाकरे पक्षाच्या बैठकीत घेण्यात आला. रविवारी उन्मेष पाटील यांच्या उपस्थिती ही बैठक पार पडली. या बैठकीत पाटील यांनी भाजपवर जोरदार हल्लाबोल केला.

यावेळी बैठकीत बोलताना पक्षाचे नेते व माजी खासदार उन्मेष पाटील यांनी भाजप पक्षासह जिल्ह्यातील महायुतीच्या चारही मंत्र्यांना लक्ष्य केलं. जिल्ह्यात चार-चार मंत्री असतानाही निम्न तापी प्रकल्प, सात बलून बंधारे यांना अद्याप सरकारकडून निधीच मिळत नाही, ही शोकांतिका असल्याचे घणाघाती टीका पाटील यांनी केली. ते म्हणाले केंद्रात व राज्यात दोन्हीकडे भाजपची सत्ता आहे, जिल्ह्यातही भाजप मजबूत आहे. तरी देखील राष्ट्रवादी काँग्रेस शरदचंद्र पवार पक्ष व शिवसेना (उद्धव बाळासाहेब ठाकरे) पक्षातील कार्यकर्त्यांना भाजपात प्रवेश दिला जात आहे. संघटना मजबूत आहे, तर मग पक्ष फोडण्याचा खटाटोप कशासाठी? भाजपने स्वतःचे घर सांभाळावे असा हल्लाबोल पाटील यांनी केला.

भाजप विरोधकांची मूट बांधून आम्ही निवडणुकीच्या मैदानात उतरणार आहोत. मात्र, भाजपच्या मनात भीती आहे, त्यामुळेच निवडणुका लांबणीवर टाकल्या जात असल्याची टीका पाटील यांनी केली. जिल्हा परिषद व महापालिकेच्या निवडणुकीत भाजपच्या विजयाचा फुगा फुटणार आहे, असही ते म्हणाले.

आगामी निवडणुकांसाठी पक्ष संघटन मजबूत करुन प्रत्येक प्रभाग व शाखा मजबुत करा अशा सूचना त्यांनी बैठकीत उपस्थित नेत्यांना दिल्या. यावेळी बैठकीला शिवसेना उपनेते गुलाबराव वाघ, जिल्हाप्रमुख कुलभूषण पाटील, महानगर प्रमुख शरद तायडे, महापालिका सभागृहातील माजी विरोधी पक्षनेते सुनील महाजन, माजी नगरसेवक खालिद बागवान, जळगाव ग्रामीण विधानसभा क्षेत्र प्रमुख रमेश पाटील, अल्पसंख्यांक आघाडीचे महानगर प्रमुख जाकीर पठाण, युवा सेना जिल्हा प्रमुख पीयूष गांधी, अशोक सोनवणे यांच्यासह पदाधिकारी उपस्थित होते.

दरम्यान या बैठकीकडे काही माजी नगरसेवकांनी पाठ फिरवल्याचे दिसून आले. माजी महापौर जयश्री महाजन या बैठकीला अनुपस्थित होत्या, तर त्यांचे पती सुनील महाजन यांनी मात्र या बैठकीत हजेरी लावली होती. पक्षात गेल्या अनेक दिवसांपासून असेच चित्र आहे. पक्षाच्या बैठकांना व मेळाव्यांना माजी नगरसेवक उपस्थित राहत नाही. माजी महापौर नितीन लढा, प्रशांत नाईक, राखी सोनवणे, नितीन बरडे, अनंत जोशी यांच्यासह इतर माजी नगरसेवक पक्षाच्या बैठकांना गैरहजर राहत आहेत.