Kirit Somaiya Politics: देशभऱ सर्व धर्मीय एकोपा, किरीट सोमय्या यांचे राजकारण मात्र मशिद आणि भोंगे यातच अडकले!

Kirit Somaiya News: सत्तेपासून दूर झाल्याने माजी खासदार किरीट सोमय्या हे अधिक आक्रमकपणे धार्मिक ध्रुवीकरणावर काम करीत असल्याचे चित्र आहे. त्यासाठी सातत्याने ते विविध दौरे करून प्रशासनाला आरोपीच्या पिंजऱ्यात उभे करीत असतात. त्यांचे हे राजकारण चर्चेचा विषय राहिले आहे.

भारत पाकिस्तान सीमेवर तणावाची स्थिती आहे. देशांत युद्धसदृश्य परिस्थिती आहे. देशभरातील सर्व राजकीय पक्ष एक दिलाने केंद्र सरकार आणि भारतीय सैन्याच्या पाठीशी उभे आहेत. त्यासाठी सर्व धर्मीय आणि विशेषतः हिंदू मुस्लिम एकतेचे चित्र पाहायला मिळत आहे. आणि मुस्लिम संघटनांनीही या पार्श्वभूमीवर पाकिस्तानचा धिक्कार केला.

देशातील राजकारण काहीही असले तरीही भाजप नेते किरीट सोमय्या यांनी मात्र आपला हेका सोडलेला नाही. माजी खासदार सोमय्या यांनी शनिवारी मुंबईतील दिंडोशी, मालाड आणि कुराड येथे भेटी दिल्या. पोलीस अधिकाऱ्यांची चर्चा करून येथील मशिन वरील भोंगे काढण्याची मागणी केली. याबाबत कारवाई न केल्यास आंदोलनाचा इशाराही दिला.

याविषयी सोमय यांनी स्वतःच समाज माध्यमावर पोस्ट टाकली आहे. आगामी दहा दिवसात मशिदीवरील भोंगे काढण्यात येतील असे त्यांनी म्हटले आहे. पोलीस अधिकाऱ्यांची बैठक झाली असून पोलीस कारवाई करणार असल्याचा दावा सोमय्या यांनी केला आहे. यावेळी त्यांच्यासमवेत भाजपचे विनायक कामत, विनोद मिश्रा, ज्ञानमूर्ती शर्मा आणि अन्य पदाधिकारी होते.

माजी खासदार सोमय्या यांनी गेले काही दिवस बांगलादेशी नागरिक या विषयावर आपले आक्रमक आंदोलन सुरू ठेवले होते. त्यासाठी मालेगाव, सटाणा, संभाजीनगर, जालना यांसह विविध शहरांना भेटी देऊन येथे बांगलादेशी नागरिक असल्याचा दावा केला होता. या शहरात प्रत्यक्षात अद्याप एकही बांगलादेशी नागरिक आढळलेला नाही. मात्र अनधिकृत कागदपत्रांच्या आधारे दिलेल्या दाखल्यामुळे काही अधिकाऱ्यांवर गुन्हे दाखल झाले आहेत.

माजी खासदार सोमय्या यांचे हे आंदोलन विरोधी पक्ष व नागरिकांच्या दृष्टीनेही टिकेचा विषय ठरले होते. देशभर सध्या भारत-पाक तणावाचे चित्र आहे. या स्थितीत नागरिकांत एकोप्याचे आणि परस्पर सौहार्दाचे वातावरण काळाची गरज आहे. मात्र भाजप नेते सोमय्या यांना त्याचे फारसे सोयरे सुतक वाटत नसावे. त्यांचा मशिद आणि भोंगे हा राजकीय राग आळवणे सुरूच आहे.

-------