Rohit Pawar : भाजप नेत्यांची भाषा घसरली, आमदार पवारांनी टायमिंग साधलं अन् VIDEO शेअर केला

Ahilyanagar News : कर्जत-जामखेड मतदारसंघातील भाजप उमेदवार आमदार प्रा. राम शिंदे आणि राष्ट्रवादी काँग्रेस पार्टी शरदचंद्र पवार पक्षाचे आमदार रोहित पवार यांच्यातील 'कांटे की टक्कर' चांगलीच रंगली आहे.

एकमेकांवर टोकाचे टीकेचे बाण सोडत असताना भाजप नेत्यांची भाषा घसरल्याचे दिसते. याचे टायमिंग साधत आमदार पवार यांनी भाजप नेत्यांची भाषा कशी घसरली, याचा व्हिडिओ समाज माध्यमांवर शेअर करत चांगलेच सुनावले.

आमदार रोहित पवार (Rohit Pawar) यांनी त्यांच्या 'एक्स' खात्यावर व्हिडिओ शेअर करत, भाजप उमेदवाराच्या भाषेवर शेलक्या शब्दात टीका केली. शिक्षक पिढी घडवत असतात. पण यातले तीन कथिक प्राध्यापक आणि एक नेता... यांची ही सुसंस्कृत भाषा बघा. या ठगांची ही भाषा ऐकून यांच्या घरच्या आई-बहिणींनाही लाज वाटली असेल. मी जे म्हणतो, यांना कर्जत-जामखेडमध्ये गुंडाराज आणायचं, त्याचाच हा ट्रेलर आहे. पण मला विश्वास आहे, यांचा पिक्चर कर्जत-जामखेड स्वाभिमानी जनता फ्लाॅप केल्याशिवाय राहणार नाही, असा विश्वास आमदार रोहित पवार यांनी व्यक्त केला.

या व्हिडिओतील भाषा पाहून व्हिडिओ शेअर करायल देखील लाज वाटत होती, असेही आमदार रोहित पवार यांनी म्हटले आहे. पण यांची लायकी जगाला कळावी यासाठी नाईलाजाने आणि अत्यंत दुःखद अंतःकरणाने मी हा व्हिडिओ शेअर करतोय, असेही आमदार रोहित पवार यांनी म्हटले आहे.

रोहित पवार यांनी शेअर केलेल्या व्हिडिओमध्ये भाजप (BJP) उमेदवार आमदार प्रा. राम शिंदे, भाजप नेते पाशा पटेल आणि आणखी एका नेत्याचा आहे. या तिघांच्या तोंडातून शिवराळ भाषा ऐकायला मिळते, असा हा व्हिडिओ आहे. पाशा पटेल यांची भाषा ऐकवत नाही. त्त्यांनी त्यांच्या भाषणात म्हतारी-म्हतारीचा किस्सा वेगळ्याच पद्धतीने रंगवून सांगितला आहे.

विधानसभा निवडणूक 2019मधील पराभवचा वचपा आमदार प्रा. राम शिंदे यांना घ्यायचा आहे. यासाठी त्यांनी मतदारसंघात जोरदारा फिल्डिंग लावली आहे. आमदार रोहित पवार यांनी देखील कोणत्याही परिस्थिती गड साबूत ठेवायचा, यासाठी संपूर्ण ताकदपणाला लावली आहे. दोघांचेही निवडणुकीत नियोजन तगडे असल्याने, निवडणूक चुरशीची होऊ लागली आहे. प्रचारासाठी अवघे चार दिवस उरले असल्याने दोन्ही बाजूने प्रचाराचा धुमधडाका सुरू आहे.