Manoj Jarange: जरांगे आज भुजबळांच्या बालेकिल्ल्यात, भुजबळ फार्मवर बंदोबस्त वाढवला, समता परिषदेचे अध्यक्ष पोलिसांच्या ताब्यात

मराठा आंदोलक मनोज जरांगे (Manoj Jarange) आणि ओबीसी नेते, राष्ट्रवादी काँग्रेसचे मंत्री छगन भुजबळ (Chhagan Bhujbal) यांच्यामध्ये आरक्षणावरुन आरोप-प्रत्यारोपांच्या फैरी झडत आहेत.भुजबळाच्या बालेकिल्ल्यात जरांगे यांच्या शांतता रॅलीचा नाशिकमध्ये आज समारोप होत आहे. नाशिक पोलिस सगळ्या परिस्थितीवर लक्ष ठेवून आहेत.

मनोज जरांगे यांच्या नाशिक दौऱ्यापूर्वी पोलिसांनी खबरदारीचा उपाय म्हणून राष्ट्रवादी काँग्रेसचे नेते, मंत्री छगन भुजबळ यांच्या भुजबळ फार्म या निवासस्थानावर पोलिसांचा बंदोबस्त वाढविण्यात आला आहे. समता परिषदेचे सिन्नर तालुकाअध्यक्ष राजेंद्र जगताप आणि शहराध्यक्ष विशाल चव्हाण यांना त्यांच्या निवासस्थानावरुन नाशिक पोलिसांनी ताब्यात घेतले आहे.

मनोज जरांगे यांच्या दौऱ्यांच्या पार्श्वभूमीवर समता परिषदेचे पदाधिकारी, ओबीसी नेत्यांवर पोलिस नजर ठेवून आहेत. जरांगेच्या दौऱ्यानिमित्त पोलिस यंत्रणा सर्तक झाली आहे. मराठा आंदोलकांमध्ये छगन भुजबळ यांच्याबाबत संतापाची लाट आहे. काही अनुचित प्रकार घडू नये, याची पोलिस काळजी घेत आहे. जरांगे यांच्या रॅलीासाठी नाशिकमध्ये दीड हजार पोलिसांचा बंदोबस्त आहे.

शरद पवार यांनी मराठा आरक्षणाबाबतची काल (सोमवारी) भूमिका मांडली. मनोज जरांगे, मराठा समाजाचे नेते आणि ओबीसी समाजाच्या नेत्यांची एकत्र बैठक झाली पाहिजे, असं मुख्यमंत्र्याना सुचवल्याचं शरद पवार म्हणाले.

शरद पवार यांच्या या विधानाला मनोज जरांगे पाटील यांनी विरोध दर्शवला आहे. शरद पवार यांनी केलेल्या आवाहनाला मनोज जरांगे पाटील यांनी विरोध केला आहे. एकत्र बसण्याची गरज काय? सरकारला माहिती आऱक्षण कसं द्यायचं ते देत नाहीत. चर्चा करून हा नाही तो नाही आला, मग ढकलाढकली कधीपर्यंत करायची. चर्चेला बसण्याची गरज काय आहे?, असा प्रश्न मनोज जरांगे यांनी उपस्थित केला आहे.