MNS News : राज ठाकरेंच्या निकटवर्तीयांविरोधात खंडणीचा गुन्हा...

Nashik News : नाशिक शहरात रोजगार मेळावा आयोजित करणाऱ्या मनसेच्या पदाधिकाऱ्यांवर सिडको पोलिसांनी 1 लाख रुपयांची खंडणी मागितल्याचा गुन्हा दाखल केला आहे. मनसे प्रमुख राज ठाकरे यांच्या निकटवर्तीयांविरोधात दाखल झालेल्या गुन्ह्याने खळबळ उडाली आहे. महाराष्ट्र नवनिर्माण सेनेचे शहर उपाध्यक्ष आदेश खांडरे, प्रतीक निकम, चेतन शेलार, अक्षय खांडरे यांच्या विरोधात सिडको पोलिसांनी ही कारवाई केली आहे.

यासंदर्भात कंत्राटदार राजेंद्र गोरडे यांनी ही तक्रार केली आहे. पोलिस निरीक्षक दीपक ठाकूर यांनी संबंधितांची चौकशी करण्यात येत असून, लवकरच त्याबाबत पुढील कारवाई करण्यात येईल असे सांगितले. महाराष्ट्र नवनिर्माण सेनेतर्फे नाशिक शहरात बेरोजगार युवकांसाठी येत्या 15 फेब्रुवारीला रोजगार मेळावा आयोजित करण्यात आलेला होता. या मेळाव्याच्या तयारीत आयोजक व्यस्त होते.

संबंधितांनी महापालिकेच्या प्रभाग क्रमांक 24 मध्ये सीसीटीव्ही कॅमेरा बसविण्याचे काम बंद पाडले. कंत्राटदाराला पुन्हा हे काम सुरू करावयाचे असेल, तर एक लाख रुपये द्यावे लागतील असे धमकावले. त्यामुळे संबंधित कंत्राटदाराने पोलिसांशी संपर्क करून तक्रार केली. त्यावरून गुन्हा दाखल करण्यात आला असून, हे सर्व कार्यकर्ते राज ठाकरे यांचे निकटवर्तीय असल्याचे बोलले जाते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

आगामी महापालिका निवडणुकीच्या पार्श्वभूमीवर शहरातील राजकारण तापलेले आहे. सर्वच राजकीय पक्ष आणि त्यांचे इच्छुक निवडणुकीची तयारी करीत आहेत. शिवसेनेच्या एकनाथ शिंदे गटाच्या नेत्यांना मंजूर झालेल्या निधीतून विविध कामे सुरू आहेत. या कामाविषयी अनेक तक्रारी आहेत. त्यातच हा प्रकार घडल्याने त्याला राजकीय वासदेखील आहे.

त्याचा फटका मनसेच्या पदाधिकाऱ्यांना तर बसला नाही ना ? असे बोलले जाते. दरम्यान, मनसेचे नाशिक संपर्कप्रमुख किशोर शिंदे यांनी याबाबत स्पष्टीकरण दिले आहे. मनसेच्या पदाधिकाऱ्यांविरोधात दाखल केलेला गुन्हा राजकीय सूडबुद्धीतून झालेला आहे. स्थानिक राजकीय स्पर्धेतून मनसे पदाधिकाऱ्यांना नाउमेद करण्याचा हा प्रयत्न आहे. त्याचा आम्ही सामना करून सत्य बाहेर आणू, असे ते म्हणाले.

(Edited by Amol Sutar)

R