Jal Jeevan Mission : 'जल जीवन'ची तक्रार थेट केंद्राकडे; पवारसाहेबांच्या शिलेदारानं भ्रष्टाचार दाखवतो, असं दिलं चॅलेंज!

Ahilyanagar News : अहिल्यानगर लोकसभा मतदारसंघात जल जीवन मिशन योजनेअंतर्गत करण्यात आलेल्या पाणी योजनांच्या कामांचे केंद्र सरकारच्या समितीकडे थर्ड पार्टी ऑडिट करण्याची मागणीसाठी खासदार नीलेश लंके यांनी जलशक्ती मंत्री सी. आर. पाटील यांची नवी दिल्लीत भेट घेतली.

खासदार लंके यांनी मंत्री पाटील यांना पत्र देताना, साहेब तुम्ही माझ्याबरोबर चला, कामात निकृष्टपणा कसा झाला असून, त्यातील भ्रष्टाचार दाखवतो, असं सांगितलं.

जनजीवन मिशन योजनेअंतर्गत मंजुर 79 योजनांपैकी नगर जिल्ह्यातील श्रीगोंदा तालुक्यातील दहा योजना पूर्ण झाल्या आहेत. या कामांमध्ये मोठया प्रमाणावर भ्रष्टाचार झालेला आहे. तशा तक्रारीही आपणाकडे प्राप्त झाल्या आहेत. श्रीगोंदा तालुक्यातील अजनुज, आनंदनगर आणि अन्य आठ योजनांचे केंद्रीय समिती मार्फत ऑडिट केल्यास या कामांमधील भ्रष्टाचार (Corruption) उघड होणार आहे. मंत्री पाटील यांनी लवकरात लवकर या योजनांचे ऑडिट करावे, अशी मागणी खासदार लंके यांनी निवेदनात केली.

जल जीवन मिशन योजनेअंतर्गत राबविण्यात आलेल्या योजनांच्या कामांचे केंद्रीय समितीमार्फत ऑडिट करण्यासंदर्भात आपण जिल्हा परिषदेच्या ग्रामीण पाणीपुरवठा विभागाच्या कार्यकारी अभियंत्यांकडे दोन ते तीन वेळा पत्रव्यवहार करण्यात आला, मात्र त्यांच्याकडून सकारात्मक प्रतिसाद मिळाला नसल्याचे खासदार लंके (Nilesh Lanke) यांनी सांगितले.

चला, मी भ्रष्टाचार दाखवितो !

डिसेंबर महिन्यात जिल्हाधिकारी कार्यालयात दिशा समितीच्या बैठकीतही खासदार नीलेश लंके यांनी या योजनेतील भ्रष्टाचाराकडे लक्ष वेधले होते. माझ्यासोबत चला, मी भ्रष्टाचार दाखवितो. भ्रष्टाचार नसेल, तर मी राजीनामा देतो, असे आव्हान दिले होते.

योजनेसाठी निकृष्ट पाईप

या योजनेसाठी निकृष्ट दर्जाचे पाईप वापरण्यात आले आहेत. हे पाईप जमिनीमध्ये एक फुटावर गाडण्यात आले आहेत. कोट्यवधींचा निधी मंजूर होऊन पाच टक्के योजनांची कामेही दर्जेदार झालेली नाहीत. बिले काढण्यासाठी आणि टक्केवारीसाठी कामे करण्यात येणार असतील, तर योजना यशस्वी होणार नसल्याचेही दिशा समितीच्या बैठकीत खासदार लंके यांनी निदर्शनास आणून दिले होते.