Nashik MVP News : वार्षिक सभेतल्या राड्यानंतरही मविप्रत वादाच्या ठिणग्या कायम, आणखी एका मुद्द्यावरुन अध्यक्ष सरचिटणीसांमध्ये जुंपली

Nashik MVP News : नाशिक जिल्हा मराठा विद्याप्रसारक समाज संस्थेच्या १११ व्या वार्षिक सर्वसाधरण सभेत विद्यापीठाच्या प्रस्तावावरुन प्रचंड गदारोळ झाला. वार्षिक सभेप्रसंगी दोन्ही गट आमनेसामने आले होते, मोठा वाद झाला होता. सभा होऊन आठवडा उलटला तरीही हा वाद मिटलेला नसून वादाची धग कायम आहे. आता आणखी एका मुद्द्यावरुन अध्यक्ष डॉ. सुनिल ढिकले व सरचिटणीस अॅड. नितीन ठाकरे हे दोघे आमनेसामने आले आहेत.

दरवर्षीप्रमाणे रविवारी (दि. १४) मविप्रची वार्षिक सर्वसाधरण सभा पार पडली. विद्यापीठाच्या मुद्यावरुन या सभेत सत्ताधारी व विरोधकांमध्ये जोरदार राडा झाला. सरचिटणीस ठाकरे यांनी मविप्र विद्यापीठाचा प्रस्ताव मंजूर झाल्याचा दावा केला होता. मात्र अध्यक्ष ढिकलेंनी प्रस्ताव नामंजूर झाल्याचे जाहीर केले होते. या वादावर तोडगा निघत नाही तोच वार्षिक सर्वसाधारण सभेच्या इतिवृत्तावरून अध्यक्ष व सरचिटणीस यांच्यात वादाची नवी ठिणगी पडली आहे.

सभेचे इतिवृत्त मला विश्वासात घेऊन व माझ्या संमतीने लिहिण्यात यावे, अशा आशयाचे पत्र अध्यक्ष डॉ. सुनील ढिकले यांनी सरचिटणीस अॅड. नितीन ठाकरे यांना दिले आहे. इतिवृत्त मविप्र विद्यापीठाच्या बाजुने लिहण्यासाठी सत्ताधाऱ्यांकडून हालचाली सुरु असताना दुसरीकडे विरोधकही आक्रमक झाले आहेत. इतिवृत्तात प्रस्ताव नामंजूर झाल्याचा उल्लेख यावा यासाठी विरोधकांचे प्रयत्न सुरु आहेत. त्यामुळे आता हा वाद आणखी वाढण्याची शक्यता आहे. सभासदांसह जिल्हावासीयांचे घडामोडींवर लक्ष लागून आहे.

सभेचे इतिवृत्त मला विश्वासात घेऊन माझ्या संमतीने लिहिले जावे, असे पत्र सरचिटणीस अॅड. नितीन ठाकरे यांना दिल्याची माहिती स्वत: अध्यक्ष डॉ. सुनील ढिकले यांनी दिली आहे. इतिवृत्त माझ्या अनुपस्थितीत व संमतीशिवाय लिहिल्यास ते बंधनकारक राहणार नाही असं ढिकले यांनी ठाकरे यांना लिहलेल्या पत्रात म्हटलं आहे.

दरम्यान यावर बोलताना अध्यक्ष ढिकले यांचे पत्र मिळाले आहे. ते कार्यकारी मंडळाच्या बैठकीत ठेवले जाईल. संस्थेच्या कार्यकारिणीसमोर या संदर्भात चर्चा करु व त्यानंतर योग्य तो निर्णय घेऊ असं सरचिटणीस नितीन ठाकरे यांनी स्पष्ट केलं आहे. (Nashik News)

दरम्यान यासंदर्भात काही सभासदांकडून वेगळाच दावा करण्यात आला आहे. इतिवृत्त अंतिम करण्याचा अधिकार उपाध्यक्षांना असल्याचा दावा काही सभासदांनी केला आहे. मागील कार्यकारिणीमध्ये तत्कालीन अध्यक्ष स्वाक्षरी करत नसल्याचे कारण सांगत अधिकार काढून घेण्यात आले असून ते अधिकार आता उपाध्यक्षांना असल्याचा दावा सभासदांनी प्रतिसभेत केल्याने त्यावरुनही संभ्रम निर्माण झाला आहे.