Nashik Kumbh Mela : हिंदुत्व अन् कुंभमेळ्याच्या नावाखाली लुटमार; 500 कोटींच्या वर्क ऑर्डरवरून दानवेंचा भाजपच्या महाजनांना घेराव

Kumbh Mela corruption : शिवसेना उद्धव बाळासाहेब ठाकरे पक्षाचे नेते तथा आमदार अंबादास दानवे यांनी नाशिकमधील आगामी कुंभमेळ्याच्या नियोजनावरून महायुती सरकारवर जोरदार टीका केली आहे.

कुंभमेळ्याच्या नावाखाली भ्रष्टाचार आणि लुटमार सुरू असल्याचा गंभीर आरोप त्यांनी केला. तसेच मंत्री गिरीश महाजन यांच्यावर अप्रत्यक्षपणे निशाणा साधत काही कामांच्या वर्क ऑर्डरवरूनही प्रश्न उपस्थित केले.

नाशिक कुंभमेळ्याच्या नियोजनाबाबत बोलताना अंबादास दानवे यांनी मंत्री गिरीश महाजन (Girish Mahajan) यांच्यावर खोचक टिप्पणी केली. कोण महाजन आहे? कोण महाजन आहे ना मंत्री? असा सवाल करत त्यांनी महाजन यांच्या जवळच्या नातेवाईकाने 500 कोटी रुपये गोळा करून बोगस वर्क ऑर्डर दिल्याचा आरोप केल्याचे सांगितले.

या कथित बोगस वर्क ऑर्डरवर काय कारवाई झाली, असा सवालही शिवसेना ठाकरे पक्षाचे (Shivsena UBT) दानवेंनी उपस्थित केला. संबंधित प्रकरणात अटक झाली का, कडक कारवाई झाली का, याबाबत पत्रकारांनी सरकारला प्रश्न विचारला आहे का, असेही त्यांनी म्हटले.

पत्रकार देखील झोपलेले आहेत. भ्रष्टाचार झाला आहे की नाही, हे त्यांनी विचारले आहे का? असा सवाल करत दानवेंनी माध्यमांच्या भूमिकेवरही टीका केली. नाशिकमध्ये प्रत्यक्ष जाऊन कुंभमेळ्याच्या नियोजनाची पाहणी करण्याचे आवाहन करत दानवे म्हणाले की, कुंभमेळ्याच्या नावाखाली नुसती लुटमार सुरू आहे. हिंदुत्वाच्या नावाखाली लुटमार सुरू असल्याचा आरोप त्यांनी केला.

सत्तार राजीनामा देणार? दानवेंनी विषय केला क्लोज

दरम्यान, मंत्री अब्दुल सत्तार राजीनामा देणार असल्याच्या चर्चेबाबतही दानवेंना प्रश्न विचारण्यात आला. एकनाथ शिंदे यांच्या नेतृत्वाखालील शिवसेनेत गळतीला सुरुवात झाली आहे का, असा सवाल करण्यात आला. त्यावर “सत्तार काही राजीनामा देत नसतो,” असे एका वाक्यात उत्तर देत दानवेंनी हा विषय संपवला.

जरांगेवरून सरकारवर निशाणा

मनोज जरांगे यांनी पुन्हा आंदोलनाची भूमिका घेतल्याबाबतही दानवेंनी सरकारला लक्ष्य केले. भाजपचे अहिल्यानगर जिल्ह्याचे पालकमंत्री राधाकृष्ण विखे पाटील यांच्या नेतृत्वाखाली नेमलेल्या समितीने जरांगे यांना दिलेली आश्वासने पाळली नसल्याचा आरोप त्यांनी केला. सरकारकडून केवळ आश्वासने दिली जातात आणि त्यानंतर त्यांची अंमलबजावणी होत नाही. त्यामुळेच मनोज जरांगे यांच्यावर पुन्हा आंदोलन करण्याची वेळ आली आहे, असा दावा दानवेंनी केला.