Nashik MLC: एकनाथ शिंदेंच्या शिलेदाराची नाशिकमध्ये दिवसभर धावपळ, पण हाकेच्या अंतरावरील 'संकटमोचक' त्यांच्यासाठी 'नॉट रिचेबल'

Uday Samant News: विधान परिषदेची निवडणूक महायुतीसाठी परस्परांना भविष्यातील रणनीती स्पष्ट करणारी ठरू शकते. त्याची प्रचिती जळगाव आणि नाशिक येथून येऊ लागली आहे. या निवडणुकीत शिवसेनेच्या एकनाथ शिंदे पक्षाला स्पष्ट संदेश मिळाल्याची चर्चा आहे. नाशिक विधान परिषदेच्या निवडणुकीत गोकुळ पिंगळे या अपक्ष उमेदवाराने बंड केले आहे.

त्यांच्या जोडीला नाशिकच्या राजकारणात स्थान नसलेले प्रसाद हिरे आले आहेत. या दोन्ही उमेदवारांनी उपमुख्यमंत्री एकनाथ शिंदे यांच्या शिलेदाराला चांगलेच दमवले. उपमुख्यमंत्री एकनाथ शिंदे सातत्याने महाविकास आघाडीला टिवचट आले आहेत. ठाण्याची निवडणूक बिनविरोध केल्यावरही त्यांनी महाविकास आघाडीला कमी लेखण्याची संधी सोडली नाही. हे सुरू असताना त्यांच्या पायाखाली काय राजकारण शिजते आहे, हा चर्चेचा विषय आहे.

मंत्री उदय सामंत बंडखोरांना शांत करण्यासाठी नाशिकला दुसऱ्यांदा आले. दिवसभर त्यांनी राजकीय मुत्सद्येगिरी दाखविण्याचा प्रयत्न केला. विशेष म्हणजे यावेळी त्यांनी कोकणात आणि ठाण्यात किती सहज निवडणुका काबीज केल्या, हे उदाहरण ताजे आहे. मंत्री सामंत यांच्या पहिल्या दौऱ्यात त्यांच्या जोडीला शिंदेंचे दुसरे मंत्री दादा भुसे हे देखील होते. या दौऱ्यात गोरख बोडके आणि राष्ट्रवादी अजित पक्षाच्या मुळातच स्पर्धेत नसलेल्या उमेदवारांनी त्यांचा बराचसा वेळ खाल्ला. प्रमुख बंडखोर गोकुळ गीते या दौऱ्यात त्यांना भेटलेच नाही.

शुक्रवारी मंत्री सामंत दुसऱ्यांदा नाशिकला आले. यावेळी मात्र हद्द झाली असे म्हणावे लागेल. यावेळी भाजपचे संकट मोचक गिरीश महाजन हे देखील शहरातच होते. दिवसभर उदय सामंत शिष्टाचार आणि ताफा सोडून उमेदवार गोकुळ गीते आणि मंत्री महाजन यांच्या भेटीसाठी शहरभर फिरले. मात्र यातील कोणीही त्यांना हाती लागले नाही.

शिवसेनेचे मंत्री सामंत यांचा शुक्रवारी झालेला दौरा राजकीय दृष्ट्या स्पष्ट संदेश देणारा म्हणता येईल. हाकेच्या अंतरावर असलेले भाजपचे संकट मोचक मंत्री महाजन त्यांना दिवसभर भेटू शकले नाही. त्याचा खुलासा मंत्री महाजन यांनीच रात्री उशिरा केला. कार्य बाहुल्यामुळे आपली भेट झाली नाही, असे महाजन म्हणाले.

.

या सर्व राजकीय घडामोडींमध्ये गोकुळ पिंगळे यांनी आपण अपक्ष आहोत. आपल्यावर मंत्री सामंत राजकीय दबाव आणण्याचा प्रयत्न करीत आहेत, असे त्यांनी सांगितले. दुसरीकडे मंत्री सामंत यांना आपण कोणताही दबाव आणला नाही असे सांगण्याची वेळ आली.

नाशिकच्या विधान परिषद निवडणुकीत घडलेल्या या घडामोडी पुरेशा बोलके आहेत. या माध्यमातून भाजप शिवसेना एकनाथ शिंदे पक्षाला आगामी राजकारणाची जाणीव तर करून देत नाही ना, अशी चर्चा आहे. त्या दृष्टीने विधानपरिषद निवडणूक सुरुवातीलाच एवढी रंगतदार झाली तर पुढे काय होईल? या चर्चेने सगळ्याच मतदार नगरसेवकांमध्ये आनंदी आनंद आहे