Ajit Pawar Politics : अजित पवारांच्या निर्णयावर नाराज, नाशिकचे तीनही खासदार थेट फडणवीसांकडे तक्रार करणार

Nashik Politics : जिल्हा नियोजन समितीच्या निधी वाटप प्रक्रियेत जिल्ह्यातील सर्व आमदारांना समान निधीचे वाटप करण्यात आले आहे. परंतु विरोधी पक्षातील तीन्ही खासदारांना पूर्णपणे डावलण्यात आले असून एक रुपयाचाही निधी न दिल्याने विरोधी तीन्ही खासदारांमध्ये नाराजी पसरली आहे.

शासनाकडून जिल्हा नियोजन समितीच्या योजनांसाठी 270 कोटींचा निधी प्राप्त झाला आहे. वार्षिक नियोजन हे सुमारे 900 कोटींच्या जवळपास जाते. या सर्व निधीचे नियोजन पालकमंत्र्यांकडून होत असते. परंतु नाशिक जिल्ह्याला आजूनही पालकमंत्री मिळालेला नाही. त्यामुळे अशा परिस्थिती जिल्हा नियोजन विकास मंडळाचा अधिकार अर्थमंत्र्यांकडे जातो.

त्यानुसार उपमुख्यमंत्री तथा अर्थमंत्री अजित पवार यांच्या उपस्थितीत जिल्हा नियोजन समितीची बैठक मंत्रालयात झाली. यावेळी अजित पवारांच्या उपस्थितीत निधीचे नियोजन करण्यात आले. या बैठकीत सर्व आमदारांना समान निधी देण्याचा निर्णय अजित पवारांनी घेतला. त्यानुसार जिल्ह्यातील सर्व 15 आमदारांनी समान निधी प्राप्त झाला आहे.

परंतु नाशिक जिल्ह्याला निधी देताना उपमुख्यमंत्री अजित पवार यांनी जिल्ह्यातील तिन्ही खासदारांना वगळले आहे. जिल्ह्यातील शिवसेना उद्धव बाळासाहेब ठाकरे पक्षाचे खासदार राजाभाऊ वाजे, राष्ट्रवादी काँग्रेस शरदचंद्र पवार पक्षाचे खासदार भास्कर भगरे आणि काँग्रेसच्या खासदार डॉ. शोभा बच्छाव या तीन्ही विरोधी पक्षांच्या खासदारांना एक रुपयाचाही निधी देण्यात आला नाही.

विरोधी तीन्ही पक्षांच्या खासदारांमध्ये नाराजी पसरली आहे. नाशिक, दिंडोरी व धुळे लोकसभा मतदारसंघातील तिन्ही खासदारांना निधी मिळालेला नाही. राज्यभरातील खासदारांची अशीच स्थिती असल्याने सर्व खासदार थेट मुख्यमंत्री देवेंद्र फडणवीस यांना भेटणार आहेत. येत्या आठवडाभरात त्यांची वेळ घेण्यात येणार असल्याचे खासदार भास्कर भगरे यांनी सांगितले आहे.

उपमुख्यमंत्री अजित पवार अर्थमंत्री असल्याने ते स्व पक्षाच्या आमदारांना निधी देतात असा आरोप महायुतीमधीलच घटक पक्षांमधील आमदारांनी यापूर्वी केला होता. त्यात आता नाशिकच्या तीन्ही खासदारांनीही फडणवीस यांच्याकडे जाण्याचा निर्णय घेतल्याने तीन्ही खासदार अजित पवारांबाबत देखील तक्रार करु शकतात. त्यामुळे हा विषय वादाचा ठरण्याची शक्यता वर्तवण्यात येत आहे.