Ajit Pawar Politics: अजित पवारांनी सोपवली आमदार हिरामण खोसकर यांच्यावर खास जबाबदारी!

Hiraman Khoskar News: राष्ट्रवादी काँग्रेस अजित पवार पक्षाने आदिवासी मतदारांवर लक्ष केंद्रित केले आहे. पक्षाच्या संघटनात्मक विस्तारात आदिवासी क्षेत्रात प्रभाव वाढविण्यासाठी प्रयत्न आहेत. त्यामुळे पक्षाकडून आगामी काळात राज्यातील आदिवासी क्षेत्रावर लक्ष केंद्रित केले जाणार आहे.

राष्ट्रवादी काँग्रेस अजित पवार पक्षाचे प्रदेशाध्यक्ष खासदार सुनील तटकरे यांनी विविध नव्या नियुक्त्या केल्या आहेत. यामध्ये नाशिकचे आमदार हिरामण खोसकर यांची आदिवासी आघाडीच्या अध्यक्षपदी नियुक्ती झाली. मुंबईत झालेल्या पक्षाच्या कार्यक्रमात खासदार तटकरे यांच्या हस्ते आमदार हिरामण खोसकर यांना नियुक्तीपत्र देण्यात आले.

महायुतीचा घटक पक्ष असलेल्या राष्ट्रवादी काँग्रेस अजित पवार पक्षाने आता आदिवासी क्षेत्रात लक्ष केंद्रित केले आहे. त्या दृष्टीने पक्षाच्या संघटनात्मक विस्तारासाठी आमदार खोसकर यांची नियुक्ती करण्यात आली. लवकरच आमदार खोसकर राज्यात आदिवासी भागांचा दौरा करून नव्याने युक्त्या करणार आहे.

आमदार खोसकर हे आदिवासी आमदार असून त्यांनी ग्रामपंचायत तसेच जिल्हा परिषदेसह विविध संस्थांवर प्रतिनिधित्व केले आहे. नाशिक जिल्ह्यातील चार विधानसभा मतदारसंघ आदिवासी राखीव आहेत. यातील तीन मतदारसंघात राष्ट्रवादी काँग्रेस अजित पवार पक्षाचे आमदार आहेत.

नाशिक विभागात धुळे नंदुरबार आणि नाशिक या तिन्ही जिल्ह्यांमध्ये आदिवासी लोकप्रतिनिधींचे प्राबल्य आहे. आदिवासींची संबंधीत विविध संस्था आणि शासकीय कार्यालय नाशिक येथे आहेत. नाशिक हे गेल्या काही दिवसात राज्यातील आदिवासींचे आंदोलनाचे केंद्र बनले आहे. पार्श्वभूमीवर आमदार खोसकर यांच्या नियुक्तीला महत्त्व दिले जात आहे.

महायुती सरकार मधील राष्ट्रवादी काँग्रेस अजित पवार हा एक प्रमुख पक्ष आहे. उपमुख्यमंत्री अजित पवार यांनी सातत्याने आदिवासी लोकप्रतिनिधींच्या प्रश्नांना प्राधान्य दिले आहे. राज्यातील आदिवासींचे प्रश्न समजून घेऊन पक्षाचा विस्तार करण्यासाठी आगामी काळात प्रयत्न करणार आहे. पक्ष आणि नेत्यांनी व्यक्त केलेला विश्वास सार्थ ठरविन, असे आमदार खोसकर यांनी सांगितले.

------