Dindori Lok Sabha : भारती पवारांना धक्का देण्यासाठी आता शरद पवार दिंडोरीत काय गुगली टाकणार?

अरविंद जाधव

Nashik News : सर्वाधिक कांदा उत्पादक शेतकरी असलेल्या दिंडोरी लोकसभा मतदारसंघावर कब्जा मिळवण्यासाठी भाजप आणि राष्ट्रवादीत (शरद पवार गट) थेट रस्सीखेच सुरू असणार आहे. पहिल्याच टर्ममध्ये थेट केंद्रीय राज्यमंत्रिपद घेणाऱ्या भारती पवार यांच्यासमोर उमेदवार देताना शरद पवार काय गुगली टाकणार, याकडे सर्वांचे लक्ष आहे.

मोदी गॅरंटीबाबत भाजपचा आक्रमक प्रचार आणि कांदा निर्यातबंदी अशा दोनच बाबींवर दिंडोरी लोकसभा मतदारसंघाचा प्रचार केंद्रभूत राहण्याची चिन्हे आहेत. केंद्र सरकारने कांदा निर्यात बंदी केल्यानंतर लागलीच शरद पवारांनी दिंडोरी गाठून रस्त्यावर उतरून आंदोलन केले. हा मतदारसंघ शेतकरीबहुल आहे. कांदा, द्राक्ष आणि भाजीपाल्याचे येथे उत्पादन होते. त्यातच मराठा आरक्षणाचा मुद्दाही तेवढाच महत्त्वाचा राहणार आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

कांदा निर्यातबंदीमुळे भाजप (BJP) गोत्यात येण्याची चिन्हे ओळखून शरद पवारांनी आपले लक्ष दिंडोरीकडे वळवले आहे. या मतदारसंघातील राष्ट्रवादीचे आमदार हे अजित पवार गटात गेलेले आहेत. त्यामुळे शरद पवार नेमकी काय खेळी करतात, कोणाला रिंगणात उतरवतात, याकडे सर्वाचे लक्ष लागले आहे.

दिंडोरी मतदारसंघातील येवला, दिंडोरी-पेठ, कळवण-सुरगाणा, निफाड विधानसभा मतदारसंघ राष्ट्रवादीच्या ताब्यात होते. मात्र, या मतदारसंघाच्या आमदारांनी अजित पवार गटाची वाट धरली आहे. नांदगावात शिंदे गटाचे आमदार असून चांदवड व देवळा मतदारसंघ भाजपच्या ताब्यात आहे.

या मतदारसंघातून शरद पवार (Sharad Pawar) गटाकडून दिंडोरीचे तालुकाध्यक्ष भास्कर भगरे यांच्या नावाची चर्चा आहे. भास्कर गावित, रामदास चारोस्कर, सुनीता चारोस्कर हे ठाकरे गटात असून त्यांच्या नावांची चर्चा आहे, तर काँग्रेसचे रमेश कहांडोळे इच्छुक आहेत.

गत निवडणुकीत उमेदवारी कापण्यात आलेले माजी खासदार हरिश्चंद्र चव्हाणदेखील इच्छुक आहेत. मात्र ते भाजपात आहेत. आघाडी म्हणून तगडा उमेदवार उतरवला जाण्याची शक्यता असल्याने, शरद पवार ऐनवेळी राजकीय खेळी करून कोणत्या उमेदवारास पुढे आणतात, याकडे सर्वांचे लक्ष लागले आहे.

(Edited By- Ganesh Thombare)

R...