District Bank Election : जिल्हा बँक निवडणुकीचे पडघम; संचालक समजून व्यापाऱ्याचे अपहरण, सात तोळे सोने लुटले, पारनेरमधील घटनेने खळबळ

Parner Kidnap Case: अहिल्यानगरमधील जिल्हा बँक निवडणुकीच्या पार्श्वभूमीवर पारनेर तालुक्यात रविवारी भरदिवसा अपहरण आणि लुटीची धक्कादायक घटना घडली. सेवा संस्थेचा संचालक असल्याच्या गैरसमजातून सात ते आठ अज्ञात व्यक्तींनी एका किराणा व्यावसायिकाचे अपहरण केले.

मात्र, संबंधित व्यक्ती संचालक नसल्याचे लक्षात आल्यानंतर आरोपींनी त्यांच्या अंगावरील सुमारे सात तोळ्यांचे सोन्याचे दागिने हिसकावून त्यांना रस्त्यावर सोडून पलायन केले.

याप्रकरणी अशोक फुलाजी चेडे (रा. पारनेर) यांनी पारनेर पोलिस ठाण्यात फिर्याद दाखल केली आहे. त्यानुसार अज्ञात सात ते आठ आरोपींविरुद्ध अपहरण, मारहाण आणि रस्ता लुटीचा गुन्हा (Crime) नोंदविण्यात आला आहे.

पोलिसांनी (Police) दिलेल्या माहितीनुसार, अशोक चेडे हे वैयक्तिक कामानिमित्त चाकण (जि. पुणे) येथे गेले होते. तेथून पारनेरकडे परत येत असताना नगर-कल्याण महामार्गावरील कर्जुले हर्या शिवारात त्यांच्या कारला लाल रंगाच्या एका कारने ओव्हरटेक करून अडवले.

व्यापाऱ्याला धरण परिसरात नेले

यानंतर दुसऱ्या पांढऱ्या रंगाच्या कारमधून आलेल्या आरोपींनी चालकासह चेडे यांना मारहाण केली आणि जबरदस्तीने आपल्या वाहनात बसवून मांडओहळ धरण परिसरात नेले.

सात तोळ्याचे सोने लुटले

तेथे आरोपींनी चेडे यांची ओळख विचारल्यानंतर ते सेवा संस्थेचे संचालक नसल्याचे स्पष्ट झाले. त्यानंतर आरोपींनी त्यांच्या हातातील प्रत्येकी एक तोळ्याच्या दोन सोन्याच्या अंगठ्या आणि गळ्यातील पाच तोळ्यांची सोन्याची साखळी असा सुमारे सात तोळ्यांचा ऐवज बळजबरीने काढून घेतला. त्यानंतर चेडे यांना रस्त्यावर सोडून आरोपी घटनास्थळावरून फरार झाले.

पोलिसांचा प्राथमिक अंदाज

या घटनेमुळे पारनेर तालुक्यात खळबळ उडाली असून, पोलिसांनी आरोपींचा शोध सुरू केला आहे. प्राथमिक तपासात चुकीच्या ओळखीमुळे हे अपहरण झाल्याचा संशय व्यक्त केला जात असून, घटनेमागील नेमके कारण आणि आरोपींची ओळख पटविण्यासाठी तपास सुरू आहे.