Pune Rave Party Raid : कोण काय म्हणतंय तर कोण काय, जावयाच्या अटकेवर स्वत: खडसे काय म्हणाले?

Pranjal Khewalkar arrest : पुण्यात पोलिसांनी हाय प्रोफाईल रेव्ह पार्टीवर मोठी कारवाई केली आहे. यात पाच पुरुष आणि दोन महिलांना अटक करण्यात आली आहे. यात राष्ट्रवादी (शरदचंद्र पवार) पक्षाचे ज्येष्ठ नेते एकनाथ खडसे यांचे जावई व महिला प्रदेशाध्यक्ष रोहिणी खडसे यांचे पती प्रांजल खेवलकर यांचाही समावेश असल्याची धक्कादायक माहिती समोर आली आहे.

पुण्यातील खराडी परिसरात एका प्लॅटमध्ये सुरु असलेल्या कथित रेव्ह पार्टीत सहभागी असल्याने खडसेंचे जावई खेवलकर यांनाही पोलिसांना अटक केली आहे. या रेव्ह पार्टीत कोकेन आणि गांजा या अंमली पदार्थांचे सेवन केले जात होते असे समजते.

यासंदर्भात राजकीय वर्तुळात विविध प्रतिक्रिया येत असताना एकनाथ खडसे यांनीही प्रतिक्रिया दिली आहे. खडसे म्हणाले, गेल्या काही दिवसांपासून जे वातावरण सुरु आहे, त्यानुसार असं काही घडू शकतं याचा अंदाज थोडा थोडा मलाही येत होता...कारण काही जण अत्यंत अडचणीत आहेत आणि ते आता अंतिम टप्प्यात येणार आहे. मी फारसं त्यावर बोलणार नाही. पण, पुण्यात जी काही घटना घडली आहे, ती मी मीडिया चॅनेलमधूनच पाहिलं आहे. माझं अजून प्रत्यक्षात त्यांच्याशी बोलणं झालेलं नाही. कारण ते पोलिसांच्या ताब्यात आहेत असं खडसेंनी सांगितलं.

खडसे म्हणाले माझं या निमित्ताने म्हणणं आहे की, जर ती खरी रेव्ह पार्टी असेल आणि त्या रेव्ह पार्टीत आमचे जावई गुन्हेगार असतील तर मी त्याचं समर्थन करणार नाही. परंतु या प्रकरणात पोलिस यंत्रणेने प्रामाणिकपणे तपास करावा, अशी माझी अपेक्षा आहे. पोलीस काहीही करू शकतात, अशी जनभावना आहे. त्या संदर्भात नीट फॉरेन्सिक लॅबचे रिपोर्ट व ब्लड रिपोर्ट आले पाहिजे. सर्व रिपोर्ट आल्यानंतर यावर अधिक भाष्य करता येईल. अपुऱ्या माहितीच्या आधारावर अधिक भाष्य करणे चुकीचे होईल. त्यामुळे मी नंतर पत्रकारपरिषद घेईल असं खडसे म्हणाले.

प्रामाणिक तपास केल्यानंतर याप्रकरणात तथ्य समोर येईल. जावई असो किंवा अन्य कुणी असो जर दोषी असेल तर शासन झाले पाहिजे. पण कुणाला अडकवण्याचा प्रयत्न करणार असाल तर ते सहन केले जाणार नाही. त्याचा निश्चितपणे आम्ही विरोध करू असही खडसेंनी ठणकावून सांगितलं..

दरम्यान गिरीश महाजन यांनी यावरुन खडसेंना टोला लगावला आहे. ते म्हणाले, यांचा जावई लहान मुलगा नाही की त्याला कुणी कडेवर उचलून नेऊन रात्री तिथे बसवलं. हे होणारच होतं असं त्यांना माहित होतं तर मग त्यांनी जावईबापुंना अलर्ट केलं पाहीजे होतं. त्यामुळे खडसे बोलतात त्याला काही अर्थ नाही. प्रत्येकवेळी आपल्यासोबत षडयंत्र कसं होतं? असा सवाल करत काय असेल ते समोर येईल असा निशाणा महाजन यांनी खडसेंवर लगावला आहे.