संजय राऊतांचा नाशिक दौरा फलदायी... सेनेत इनकमिंग सुरू...

नाशिक : माजी महापौर दशरथ पाटील यांचे पुत्र प्रेम यांनी आज शिवसेना (Shivsena) नेते संजय राऊत (Sanjay raut) यांच्या उपस्थितीत शिवसेनेत प्रवेश केला. आगामी महापालिका (NMC) निवडणुकीच्या पार्श्वभूमीवर शिवसेनेत इनकमींग सुरु झाल्याचे हे संकेत शिवसेनेला लाभदायी ठरण्याची चिन्हे आहेत.

आज जिल्हा शासकीय विश्रामगृह येथे झालेल्या कार्यक्रमात श्री. पाटील यांनी खासदार संजय राऊत यांच्या उपस्थितीत प्रवेश केला. यावेळी संपर्क नेते भाऊसाहेब चौधरी, महानगरप्रमुख सुधाकर बडगुजर, दत्ता गायकवाड, अजय बोरस्ते, नगरसेवक विलास शिंदे यांसह विविध पदाधिकारी उपस्थित होते.

प्रेम हे माजी महापौर दशरथ पाटील यांचे ते पुत्र होत. दशरथ पाटील शिवसेनेचे महापौर होते. त्यांनी २००९ मध्ये शिवसेनेतर्फे नाशिक लोकसभेची निवडणूक लढविली होती. त्यात त्यांचा अतिशय अल्प मातांनी पराभव झाला होता. यावेळी शिवसेनेतील एक गट त्यांच्याबरोबर नव्हता अशी चर्चा होती. त्यातूनच त्यांचा निसटता पराभव झाला होता.

त्यानंतरच्या महापालिका निवडणुकीत त्यांना शिवसेनेला जय महाराष्ट्र केला. त्यानंतर त्यांनी काही काळ काँग्रेस पक्षातही घालवला. त्यानंतर त्यांनी काँग्रेसला राम राम ठोकला. सध्या ते कोणत्याच पक्षात नव्हते. आज त्यांच्या मुलाने शिवसेनेत प्रवेश केला. त्यामुळे यानिमित्ताने एका तपाने दशरथ पाटील शिवसेनेच्या संपर्कात आले आहेत.

शिवाजीनगरला पुन्हा भाऊबंदकी

शिवाजीनगर (सातपूर) हा प्रभाग पाटील यांचा गृहप्रभाग आहे. येथे महापालिकेच्या १९९२ मध्ये झालेल्या पहिल्या निवडणुकीपासून माजी महापौर दशरथ पाटील आणि सध्या भाजपमध्ये असलेल्या व माजी सभागृह नेते दिनकर पाटील यांच्यातील राजकीय भाऊबंदकीचा प्रभाग राहिलेला आहे. प्रभागातील निवडणुकीत तेच उमेदवार राहिलेले आहेत. गेल्या दोन निवडणूकात त्याला विराम होता. यंदा पुन्हा दुसऱ्या पिढीतील राजकीय संघर्ष पुन्हा दिसण्याची चिन्हे आहेत. त्यामुळे आगामी महापालिका निवडणुक रंगण्याची चिन्हे आहेत.

...