Raj Thackeray Nashik Tour : नाशिक दौऱ्यावर गेलेले राज ठाकरे 'मनसे' पदाधिकाऱ्यांशी चर्चेविनाच परतले?

Raj Thackeray and MNS Nashik News: महाराष्ट्र नवनिर्माण सेनेचे प्रमुख राज ठाकरे बुधवारपासून नाशिक दौऱ्यावर होते. या सबंध दौऱ्यात कार्यकर्ते आणि पदाधिकारी ठाकरे यांच्याशी चर्चेसाठी ताटकळत होते. मात्र कोणाशीही संवाद न करता ठाकरे यांनी तडक मुंबई गाठली असल्याची माहिती समोर आली आहे.

राज ठाकरे बुधवारी नाशिकला मुक्कामी होते त्यांचे कार्यकर्त्यांनी स्वागत केले. गुरुवारी सकाळी ते त्र्यंबकेश्वरला गेले यादरम्यान अतुल चांडक यांच्या निवासस्थानी त्यांनी भेट दिली. यावेळी देखील पदाधिकारी भेटीसाठी प्रवेशद्वारावरच थांबले होते. मात्र या पदाधिकाऱ्यांचं राज ठाकरेंशी बोलणं झालं नसल्याचं सांगितलं गेलं आहे.

त्यानंतर त्र्यंबकेश्वरला मार्गस्थ होताना रस्त्यात ठिकठिकाणी त्यांचे कार्यकर्त्यांनी स्वागत केले. हे स्वागत स्वीकारतच ते त्र्यंबकेश्वरला पोहोचले.

त्र्यंबकेश्वरला संत निवृत्तीनाथ समाधी मंदिरात राज ठाकरे(Raj Thackeray) यांनी दर्शन घेतले. यावेळी वारकऱ्यांनी त्यांचे स्वागत केले. गुरुवारी संत निवृत्तीनाथ महाराजांची दिंडी रवाना होताना, या दिंडीत काही वेळ ते सहभागी झाले.

त्यानंतर त्यांनी त्र्यंबकेश्वर मंदिरात जाऊन पूजा केली. यावेळी त्र्यंबकेश्वर संस्थानच्या कार्यालयात त्यांचा सत्कार करण्यात आला. त्र्यंबकेश्वर मंदिराविषयीच्या इतिहासाची माहिती त्यांना विश्वस्तांनी दिली. या कार्यक्रमादरम्यानच त्यांच्या पाठीत चमक भरली. त्यामुळे त्यांनी हा कार्यक्रमही आवरता घेतल्याची माहिती समोर आली आहे.

यावेळी राज ठाकरे यांच्या समवेत संकेत देशपांडे आणि काका पाटील होते. त्यांच्या या दौऱ्यात माजी महापौर अशोक मुर्तडक, सुजाता डेरे, अंकुश पवार, रतन कुमार इचम, सुदाम कोंबडे, सलीम शेख, मनोज घोडके, सचिन सिन्हा, नामदेव पाटील, वैभव महिरे यांचे विविध पदाधिकारी सहभागी होते.

मात्र हे सर्व पदाधिकारी आणि राज ठाकरे यांचा संवाद झाला नसल्याची माहिती समोर आली आहे. त्यामुळे राज ठाकरे आले आणि देवदर्शन करून मुंबईला निघून गेले, असेच त्यांचा या दौऱ्याचे चित्र पाहायला मिळाले.

(Edited by - Mayur Ratnaparkhe)