![Circle officer A. C. Gujar](http://media.assettype.com/sarkarnama%2F2023-05%2Fafbe0662-0273-4706-b93e-f4b6372d8e6a%2FACB_Dhule_F.jpg?w=480&auto=format%2Ccompress&fit=max)
Shirpur ACB News : सातबारा उताऱ्यावर विहिरीची नोंद कमी करण्यासाठी दहा हजार रुपयांची लाच स्वीकारताना येथील मंडळ अधिकारी ए. सी. गुजर याला धुळे येथील लाचलुचपत प्रतिबंधक शाखेच्या पथकाने मुद्देमालासकट गजाआड केले. (ACB arrest Gramsevak while accepting Bribe from Farmer)
वकवाड (ता. शिरपूर) शिवारात वडिलोपार्जित शेती असलेल्या शेतकऱ्याकडून लाच घेतांना गुजर याला पकडण्यात आले. शेतकऱ्याच्या शेतात विहीर असल्याची चुकीने नोंद करण्यात आली होती. त्यामुळे संबंधिताला विहिरीसाठी शासकीय अनुदान मागणीचा अर्ज करता येत नव्हता. त्याने पाठपुरावा केल्यानंतर वकवाड येथील तलाठ्याने पाच महिन्यांपूर्वी फेरफार नोंद केली. मात्र मंडळ अधिकाऱ्याच्या सहीशिवाय विहिरीची नोंद कमी करता येणार नव्हती.
त्यामुळे त्याने मंडळ अधिकारी अशोक चिंधू गुजर याला भेटून नोंद कमी करण्याची विनंती केली. त्याच्या शेतजमिनीसंदर्भात पूर्वी केलेले हक्कसोडीचे काम व विहिरीसंदर्भात फेरफार नोंदीची मंजुरी अशा मोबदल्यात गुजर याने १५ हजार रुपयांच्या लाचेची मागणी केली. तडजोडीअंती दहा हजार रुपयात व्यवहार निश्चित झाला. शेतकऱ्याने धुळे येथील लाचलुचपत प्रतिबंधक विभागाकडे तक्रार नोंदवली. तक्रारीची खात्री झाल्यानंतर पथकाने सापळा रचून निवासस्थानी लाच घेतांना गुजर याला अटक केली. गुजर वरिष्ठ मंडळ अधिकारी असून त्याच्या निवृत्तीला अवघी दोन वर्षे शिल्लक आहेत.
येथील पोलिस ठाण्यात गुजर यांच्याविरोधात गुन्हा दाखल करण्यात आला. लाचलुचपत प्रतिबंधक विभागाचे उपअधीक्षक अनिल बडगुजर यांच्या नेतृत्वाखाली पोलिस निरीक्षक मंजितसिंग चव्हाण, राजन कदम, शरद काटके, संतोष पावरा, रामदास बारेला, भूषण खलाणेकर, गायत्री पाटील, मकरंद पाटील, प्रवीण पाटील, रोहिणी पवार, सुधीर मोरे, जगदीश बडगुजर यांनी ही कामगिरी बजावली.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.