Nashik Crime: धक्कादायक; प्रकाश लोंढे खंडणी आणि गोळीबार प्रकरणात कोणता भाजपचा नेता पोलिसांच्या रडारवर?

Prakash Londhe News: आरपीआयचे नेते प्रकाश लोंढे खंडणी आणि गोळीबार प्रकरणात अटकेत आहेत. यामध्ये त्यांचे चिरंजीव भूषण लोंढे हे फरारी तर दुसरा मुलगा दीपक लोंढे देखील अटकेत आहे. पोलिस या प्रकरणाच्या मुळाशी जाऊन तपास करीत आहेत.

सातपूर येथील ऑरा बार अँड रेस्टॉरंटच्या मालकावर खंडणीसाठी गोळीबार करण्यात आला. या प्रकरणात पाच जणांना अटक झाली आहे. सातपूर पोलिसात गुन्हा दाखल झाला आहे.

या प्रकरणाच्या सखोल तपासात गुन्ह्यासाठी वापरण्यात आलेल्या गाडीचा मालक कोण? याचा शोध घेतला जात आहे. संबंधित गुन्ह्यात ७२ नंबरची कार वापरण्यात आल्याचा दावा केला जातो. सीसीटीव्ही फुटेज मध्ये या गाडीचे चित्रीकरण आढळले आहे.

संबंधित प्रकरणाचे गांभीर्य लक्षात घेऊन पोलिसांनी या प्रकरणातील सर्व अँगल शोधले आहेत. संबंधित गाडीचा मालक कोण? याचा तपास पोलिसांनी केला. त्यात ही गाडी भाजपच्या मोठ्या पदाधिकाऱ्याची असल्याचे पोलीस सूत्रांनी सांगितले.

या गुन्ह्यातील एक आरोपी संबंधित नेत्याच्या गल्लीत राहतो. त्याने खाजगी कामासाठी गाडी हवी आहे, अशी विनंती करून ही गाडी घेतली होती. प्रत्यक्षात मात्र या गाडीचा वापर सातपूर गोळीबार प्रकरणात करण्यात आला. याविषयी प्रत्यक्ष गाडी मालकाला कोणतीही माहिती नव्हती.

पोलिसांनी या प्रकरणाच्या मुळाशी जाऊन तपास केला. त्यात संबंधित गाडी मालक भाजपच्या युवा आघाडीचा मोठा पदाधिकारी असल्याचे उघड झाले. पदाधिकाऱ्याला पोलिसांनी ताब्यात घेऊन चौकशी केल्याचे कळते.

या प्रकरणाचा तपासा अद्याप सुरू असून गाडी मालकाचा प्रत्यक्ष सहभाग आहे की नाही. याचा तपास घेतल्या जात आहे. साठी पुण्यातील अन्य आरोपींचे जबाब नोंदविले जात आहेत. त्यामुळे आरपीआय नेते, माजी नगरसेवक प्रकाश लोंढे प्रकरणात आता भाजपचा एक पदाधिकारी ही अडकण्याची शक्यता वर्तवली जात आहे.

शनिवारी सिडकोतील भाजपच्या एका माजी नगरसेवकाला दिवसभर पोलीस ठाण्यात चौकशीसाठी ठेवण्यात आले होते. फरारी असलेल्या भाजपच्या अनेक नेत्याला अटक झाली आहे. या पार्श्वभूमीवर लोंढे प्रकरणात आणखी एका भाजपच्या नेत्याचे नाव पुढे आल्याने या पदाधिकाऱ्याच्या पदावर लटकती तलवार आहे.

------